March 2, 2025
පොලිස් ස්ථානාධිපතිවරුන් මාරුකිරීම සම්බන්ධයෙන් මතුව ඇති ගැටලු පිළිබඳව සාකච්ඡා කිරීම සඳහා ජාතික පොලිස් කොමිසම නීතිපතිවරයා සමග සාකච්ඡාවක් ඉල්ලා ඇතැයි වාර්තා වේ.
මෙම හමුව ඉදිරි සතියේදී පැවැත්වීමට බොහෝ දුරට ඉඩ ඇති බව ආරංචි මාර්ග සඳහන් කරයි.
ජාතික පොලිස් කොමිසම මෙම රැස්වීම ඉල්ලා ඇත්තේ, වැඩබලන පොලිස්පති ප්රියන්ත වීරසූරිය නීතිපති දෙපාර්තමේන්තුවෙන් මතය විමසා පොලිස් ස්ථානාධිපතිවරුන් පත්කිරීම සම්බන්ධයෙන් කටයුතු කිරීමට තමාට බලය ඇති බව ප්රකාශ කිරීම හමුවේ පැනනැගුණු මතභේදාත්මක තත්ත්වයෙන් අනතුරුවය.
ජාතික පොලිස් කොමිසමට පොලිස් ස්ථානාධිපතිවරුන් පත්කිරීම සඳහා බලය ඇති බව ඉතා පැහැදිලිව පෙනෙන නිසා, නීතිපතිවරයා හමුවන්නේ, ඒ සම්බන්ධයෙන් නීති විග්රහයක් ලබා ගැනීමට නොව, පොලිස්පතිවරයා ජාතික පොලිස් කොමිසමට නොදන්වා ඒ පිළිබඳ නීතිපතිවරයාගේ මතය විමසා ඇති බැවින් ඒ පිළිබඳව සාකච්ඡා කිරීමට බව එම කොමිසම පවසයි.
එවැනි පත්කිරීම් සඳහා වන ක්රියාපටිපාටිය නීතියෙන් පැහැදිලි වන බවත්, එවැනි බලයක් පොලිස්පතිවරයාට නොමැති බවත් ජාතික පොලිස් කොමිසම පවසයි.
මීට පෙර වැඩබලන පොලිස්පති වීරසූරිය ජාතික පොලිස් කොමිසමෙන් ලිඛිතව ඉල්ලා සිටියේ, නීතිපතිවරයාගේ නීතියේ විග්රහය මත පදනම්ව එම ඉල්ලීම කරමින් ස්ථානාධිපතිවරුන්ට පත්වීම් ලබාදීමේ වගකීම තමාට පවරන ලෙසයි.
ජාතික පොලිස් කොමිසම සභාව එම ඉල්ලීම ප්රතික්ෂේප කරමින් පිළිතුරු දී ඇති අතර, දෙපාර්ශවය අතර මතභේදය පුළුල් කරමින් එම ලිපියේ පිටපතක් ආණ්ඩුක්රම ව්යවස්ථා සභාවට යොමුකර තිබේ.
රාජ්ය සේවා කොමිෂන් සභාව විසින් නියම කර ඇති පරිදි ස්ථානාධිපතිවරුන් පත්කිරීම අනුමත කිරීමේදී අනුගමනය කළ යුතු ක්රියාපටිපාටියක් ඇති බවත් එය පිළිපැදිය යුතු බවත් ජාතික පොලිස් කොමිසම පවසයි.
21 වැනි ආණ්ඩුක්රම ව්යවස්ථා සංශෝධනය යටතේ පොලිස්පතිවරයා හැර අනෙකුත් පොලිස් නිලධාරීන් පත්කිරීම, උසස්වීම්, ස්ථාන මාරුවීම්, විනය පාලනය සහ සේවයෙන් පහකිරීම සම්බන්ධයෙන් ජාතික පොලිස් කොමිසමට පුළුල් බලතල ඇත.
