ප්‍රංශයේ පැවැත්වීමට නියමිත G7 රාජ්‍ය නායක සමුළුවට සමගාමීව, ඉන්දීය අග්‍රාමාත්‍ය නරේන්ද්‍ර මෝදි සහ ඇමෙරිකානු ජනාධිපති ඩොනල්ඩ් මහතා අතර විශේෂ ද්විපාර්ශ්වික සාකච්ඡාවක් පැවැත්වීමට නියමිත බව ‘ද හින්දු’ පුවත්පත වාර්තා කරයි.

දෙරටේම අවධානය දිනාගත් මෙම සුවිශේෂී හමුව එළඹෙන ජූනි 16 සහ 17 යන දිනවලදී සිදුවනු ඇතැයි අපේක්ෂා කෙරේ.

ප්‍රංශ ජනාධිපති එමානුවෙල් මැක්‍රෝන්ගේ සත්කාරකත්වයෙන් පැවැත්වෙන මෙම ඉහළ පෙළේ සමුළුව සඳහා තමන් සහභාගී වන බව ජනාධිපති ඩොනල්ඩ් ට්‍රම්ප් මේ වන විටත් නිල වශයෙන් තහවුරු කර ඇත.

වාර්තා වන අන්දමට අග්‍රාමාත්‍ය නරේන්ද්‍ර මෝදිගේ මෙම ප්‍රංශ නිල සංචාරය අදියර දෙකකින් ක්‍රියාත්මක වීමට සැලසුම් කර තිබේ.

ඒ, පළමු අදියර ජූනි 13 වනදා සිට 14 වනදා දක්වා සහ දෙවන අදියර ජූනි 16 වනදා සිට 19 වනදා දක්වා ලෙසයි.

මෙම සංචාරයේ විශේෂාංගයක් ලෙස, ඉන්දීය අග්‍රාමාත්‍යවරයා ජූනි 14 වැනිදා ප්‍රංශයේ නීස් නුවරදී එරට ජනාධිපති එමානුවෙල් මැක්‍රෝන් හමුවී ද්විපාර්ශ්වික සබඳතා ශක්තිමත් කරගැනීම වෙනුවෙන් සාකච්ඡා පැවැත්වීමටද නියමිතය.

ඉන්දියාව සහ ඇමෙරිකා එක්සත් ජනපදය අතර නව ද්විපාර්ශ්වික වෙළඳ ගිවිසුමක් අත්සන් කිරීම සම්බන්ධයෙන් මේ දිනවල රාජ්‍යතාන්ත්‍රික මට්ටමින් දැඩි ලෙස සාකච්ඡා වෙමින් පවතී.

එවැනි පසුබිමක, ලෝකයේ බලවත්ම රාජ්‍යයන් දෙකක නායකයන් වන මෝදි සහ ට්‍රම්ප් අතර පැවැත්වෙන මෙම බලාපොරොත්තු සහගත හමුව, දෙරටේ අනාගත ආර්ථික සහ වෙළඳ සබඳතාවල නව හැරවුම් ලක්ෂ්‍යයක් වනු ඇතැයි දේශපාලන විචාරකයෝ පෙන්වා දෙති.