ශ්‍රී ලංකා නිදහස් පක්ෂයේ සභාපති ලෙස ඇමැති විජේදාස රාජපක්ෂ සහ වැඩබලන මහලේකම් ලෙස කීර්ති උඩවත්ත පත්කිරීම අභියෝගයට ලක්කරමින් ශ්‍රී ලංකා නිදහස් පක්ෂ පාර්ලිමේන්තු මන්ත්‍රී දුමින්ද දිසානායක අද කොළඹ දිසා අධිකරණය හමුවේ නීතිමය ක්‍රියාමාර්ගයක් ආරම්භ කළේය.

ජනාධිපති නීතිඥ විජේදාස රාජපක්ෂ ඇමතිවරයාට සහ නීතීඥ කීර්ති උඩවත්තට පිළිවෙළින් ශ්‍රීලනිප සභාපතිවරයා සහ පක්ෂයේ වැඩබලන මහලේකම්වරයා ලෙස කටයුතු කිරීම වළක්වාලමින් වාරණ නියෝගයක් නිකුත් කරන ලෙස පැමිණිලිකරු දිසානායක ඉල්ලා සිටියි.

මැයි 12 වැනි දින පැවැති විධායක කමිටු රැස්වීමේදී ගනු ලැබූ සියලු තීරණ නීතියෙන් වලංගු නොවන බවට ප්‍රකාශ කරන ලෙස පැමිණිලිකරු වැඩිදුරටත් ඉල්ලා සිටියි.

විධායක කමිටු රැස්වීම ශ්‍රීලනිප ව්‍යවස්ථාවේ විධිවිධානවලට පටහැනිව නීතිවිරෝධී ලෙස කැඳවා ඇති බවත්, එබැවින් එහි පසුව පත්කිරීම් නීත්‍යානුකූලව වලංගු නොවන බවත් පැමිණිලිකරු චෝදනා කළේය.

අධිකරණය වාරණ නියෝගයක් නිකුත් කරන්නේද යන්න පිළිබඳ තීන්දුව හෙට (15) ලබාදීමට නියමිතය.

මේ අතර, පක්ෂයේ සභාපතිවරයා ලෙස ඇමැති විජේදාස රාජපක්ෂ සහ වැඩබලන මහලේකම්වරයා ලෙස කීර්ති උඩවත්ත පත්කළ නව නිලධාරී මණ්ඩලයට බාධාකිරීම සියලු පාර්ශවයන්ට වළක්වමින් කඩුවෙල දිසා අධිකරණය මැයි 13 වැනිදා වාරණ නියෝගයක් නිකුත් කර තිබිණි.