කොළඹ සිට මහනුවර දක්වා නිරුවතින් යතුරුපැදියකින් ගමන් කළ පුද්ගලයකු අද උදෑසන කඩුගන්නාව පොලිසිය විසින් අත්අඩංගුවට ගෙන තිබේ.

නිලධාරීන්ගේ දැඩි උත්සාහයකින් පසු 23 හැවිරිදි මෙම පුද්ගලයා අත්අඩංගුවට ගත් බව පොලිසිය පවසයි.

මහනුවර-කොළඹ මාර්ගය ඔස්සේ යතුරුපැදිය පදවාගෙන යන පුද්ගලයා නිරීක්ෂණය කළ පොලිස් නිලධාරීන් කිහිපදෙනෙකු ඔහු අත්අඩංගුවට ගැනීමට උත්සාහ කළ නමුත් කිසිවෙකුට ඔහු අල්ලා ගැනීමට නොහැකි විය.

කෑගල්ල සහ මාවනැල්ල පොලිසිය ද එම පුද්ගලයා පසුපස හඹාගිය නමුත් එය අසාර්ථක විය.

කඩුගන්නාව සහ පේරාදෙණිය පොලිසියට දැනුම් දීමෙන් පසු, කඩුගන්නාව නිලධාරීහු මාර්ග බාධක යොදා යතුරුපැදිය නැවැත්වීමට සමත්වූහ.

අත්අඩංගුවට ගත් පුද්ගලයා අහංගම ප්‍රදේශයේ පදිංචි 23 හැවිරිදි පුද්ගලයකු ලෙස හඳුනාගෙන තිබේ.

ඔහු අද අධිකරණයට ඉදිරිපත් කිරීමට නියමිතව තිබුණු අතර, එහිදී මානසික සෞඛ්‍ය ඇගයීමක් ලබාගැනීමට අවසර ලබා ගැනීමට නියමිතය.