රත්නපුර දිස්ත්‍රික් ජාතික ජන බලවේගයේ පාර්ලිමේන්තු මන්ත්‍රී ශාන්ත පද්මකුමාර ඇතුළු පිරිසක් පොලිස් නිලධාරියෙකුට තම රාජකාරිය අවසන් කර නිවසට යමින් සිටියදී පහර දුන් බවට එල්ල වූ චෝදනා මත ඇඹිලිපිටියේ කොලොන්න පොලිස් ස්ථානය පරීක්ෂණයක් ආරම්භ කර තිබේ.

සූරියකන්ද පොලිස් ස්ථානයට අනුයුක්තව සේවය කරන මෙම නිලධාරියා සෙනසුරාදා (20) රාත්‍රියේ සිදු වූ ප්‍රහාරයෙන් තුවාල ලබා ඇඹිලිපිටිය රෝහලේ ප්‍රතිකාර ලබමින් සිටී.

වාර්තාවලට අනුව, මෙම නිලධාරියා මෑතකදී මන්ත්‍රීවරයාගේ මාමණ්ඩියට අයත් ඉඩමක සූරියකන්ද පොලිසිය විසින් සිදු කරන ලද ගංජා වැටළීමකට සහභාගී වී ඇත.

මන්ත්‍රීවරයා සහ තවත් අය වාහනයකින් පැමිණ තමාට තර්ජනය කර පහර දුන් බව නිලධාරියා කියාසිටියි.

මේ සම්බන්ධයෙන් ඔහු කොළොන්න පොලිසියට පැමිණිල්ලක් කර ඇති අතර ඇඹිලිපිටිය කොට්ඨාශයේ ස්ථානාධිපතිවරයාගේ මඟපෙන්වීම යටතේ පරීක්ෂණ සිදුවෙමින් පවතී.