October 21, 2026
ගලගොඩඅත්තේ ඥානසාර භික්ෂුවට සහාය පළකරමින් භික්ෂූන් වහන්සේලා සංවිධානය කළ පාගමන ආණ්ඩුව පෙරළීමේ අරමුණින් සිදුකළ එකක් නොවන බව ජ්‍යෙෂ්ඨ මහාචාර්ය පූජ්‍ය කොටපිටියේ රාහුල අනුනායක හිමියෝ අද (20) පැවසූහ.
විශේෂ ජනමාධ්‍ය හමුවකට එක්වෙමින් අනුනායක හිමියන් පැවසුවේ ඥානසාර හිමියන් ජාතිවාදයේ හෝ දේශපාලනයේ නිරත නොවූ බවයි. එමෙන්ම රට තුළ ආගමික සහ ජාතිවාදී බෙදීම් නොමැති පසුබිමක, එවැන්නක් පවතින බව පෙන්වීමට ඇතැම් පාර්ශවයන් උත්සාහ කරමින් සිටින බවද උන්වහන්සේ සඳහන් කළහ.
ඥානසාර හිමියන් වෙනුවෙන් පෙනීසිටින තරුණ භික්ෂූන් වහන්සේලාගේ ක්‍රියාකාරකම් දේශපාලන ව්‍යාපාරයක් ලෙස අර්ථකථනය කිරීම ප්‍රතික්ෂේප කළ රාහුල හිමියන්, උන්වහන්සේලා එක්ව සිටින්නේ සිවුර සහ බුද්ධ ශාසනය ආරක්ෂා කරගැනීම සඳහා බව අවධාරණය කළහ.
යම් සිදුවීමක් සම්බන්ධයෙන් රජය සමඟ පවතින නොගැලපීම හෝ අසම්මුතිය ප්‍රකාශ කිරීම, රජයට එරෙහි වීමක් ලෙස ස්වයංක්‍රීයව අර්ථකථනය නොකළ යුතු බවද කොටපිටියේ රාහුල හිමියෝ වැඩිදුරටත් පැවසූහ.
භික්ෂූන් වහන්සේලාට තම අදහස් සාමකාමීව සහ තාර්කිකව ප්‍රකාශ කිරීමට හැකියාව තිබිය යුතු බව උන්වහන්සේ අවධාරණය කළහ.
ඥානසාර හිමියන්ගේ සිවුර ඉවත්කළ ආකාරය විවේචනය කළ අනුනායක හිමියන්, එම ක්‍රියාවලිය නිසි වේදිකාවන් සහ ක්‍රමවේදයන්ට අනුකූලව සිදුවිය යුතුව තිබූ බවද පැවසූහ.
එමෙන්ම මෙම ගැටලුව නිරාකරණය වන තෙක් මෙම සටන ඉදිරියටම ගෙන යන බවද පූජ්‍ය කොටපිටියේ රාහුල හිමියෝ වැඩිදුරටත් සඳහන් කළහ.
