රන් මාල වංචාවක් සම්බන්ධයෙන් තරුණ නිළියක් අද (30) අත්අඩංගුවට ගෙන කඩුවෙල මහේස්ත්‍රාත් අධිකරණයට ඉදිරිපත් කර ඇති බව පොලිසිය පවසයි.

ජාතික ක්‍රිකට් ක්‍රීඩකයකුට අයත් රුපියල් 900,000 කට වඩා වටිනා රන් මාලයක්, හිමිකරුගේ අවසරයකින් තොරව, බත්තරමුල්ලේ පෞද්ගලික මූල්‍ය ආයතනයක උකස් කළ බවට ලැබුණු පැමිණිල්ලක් මත නිළිය අත්අඩංගුවට ගත් බව පොලිසිය පවසයි.

ඇය මාලය සඳහා රුපියල් 600,000 ක් ලබාගෙන ඇත.

තලංගම පොලිස් අපරාධ අංශය විසින් සැකකාරිය අත්අඩංගුවට ගෙන අධිකරණයට ඉදිරිපත් කරන ලදී.

අධිකරණ කටයුතු අතරතුර, විත්තියේ නීතිඥවරයා අධිකරණයට දැනුම්දුන්නේ මාලය උකස් කර තිබුණද, එය ලබාගෙන එහි හිමිකරුට ආපසු ලබාදීමට පියවර ගත හැකි බවයි.

රුපියල් 500,000 බැගින් වූ ශරීර ඇප දෙකක් සහිතව සැකකාරිය ඇප මත මුදාහැරීමට වැඩබලන මහේස්ත්‍රාත්වරයා නියෝග කළේය.

මාලය භාරයට ගෙන සාක්ෂි ලෙස ඉදිරිපත් කරන ලෙසද අධිකරණය තලංගම පොලිසියට නියෝග කළේය.

නඩුව අප්‍රේල් 22 වැනි දින වැඩිදුර විභාගය සඳහා නියම කරන ලදී.