කාන්තාවන් රවටා, මත්ද්‍රව්‍ය ලබා දී, ඔවුන්ගේ භාණ්ඩ සොරකම් කර, මඩකලපුව කොක්කඩිචෝලෙයි හි ළිඳකට දමාගිය බවට චෝදනා එල්ල වූ සිද්ධිය සම්බන්ධයෙන් වත්තල ප්‍රදේශයේ ඖෂධ ශාලාවක 49 හැවිරිදි හිමිකරු අත්අඩංගුවට ගෙන තිබේ.

නැගෙනහිර පළාත් අපරාධ අංශයේ නිලධාරීන් විසින් පසුගිය ඉරිදා (29) සැකකරු අත්අඩංගුවට ගෙන පසුදා මඩකලපුව මහේස්ත්‍රාත් අධිකරණයට ඉදිරිපත් කරන ලදී.

එහිදී ඔහු දින 03ක් ප්‍රශ්න කිරීම සඳහා රඳවා ගැනීමට අධිකරණය අවසර ලබා දී තිබේ.

මෙම නවතම අත්අඩංගුවට ගැනීමත් සමඟ සිද්ධිය සම්බන්ධයෙන් අත්අඩංගුවට ගත් මුළු සැකකරුවන් සංඛ්‍යාව හය දක්වා ඉහළ යන බව පොලිසිය පවසයි.

චෝදනා එල්ල වන්නේ මෙම කණ්ඩායම තනිවම ගමන් කරන කාන්තාවන් ඉලක්ක කර, ත්‍රිරෝද රථයකට නැගීමට පොළඹවා, මත් ද්‍රව්‍ය ලබා දී, ආභරණ සොරකම් කර, සිහිසුන්ව සිටියදී ළිඳට දමා ගිය බවයි.

එලෙස මොවුන්ගේ ග්‍රහණයට නතු වූ එක් කාන්තාවක් මිය ගිය අතර, තවත් අයකු දිවි ගලවා ගැනීමෙන් පසු මඩකලපුව ශික්ෂණ රෝහලට ඇතුළත් කරන ලදී.

දිවිගලවා ගත් කාන්තාවගේ තුන් හැවිරිදි දරුවා අතහැර දමා ගොස් සිටියදී ආරක්ෂිතව සොයා ගන්නා ලදී.