පසුගියදා නිකුත් කරන ලද වාහන ආනයන බදු තීරණයට අදාළ අභ්‍යන්තර තොරතුරු නිල ගැසට් නිවේදනය නිකුත් කිරීමට පෙර ව්‍යාපාරිකයන් පිරිසකට දැනගන්නට ලැබී ඇති බවට හිටපු බස්නාහිර පළාත් සභා මන්ත්‍රී සමගි ජන බලවේගයේ සාමාජික නිරෝෂන් පාදුක්ක චෝදනා කරයි.

ශ්‍රී ලංකා මහ බැංකුව ඉදිරිපිටදී මාධ්‍යවේදීන් අමතමින් පාදුක්ක කියා සිටියේ, ජනාධිපති අනුර කුමාර දිසානායක විසින් 15 වැනිදා නිකුත් කරන ලද අති විශේෂ ගැසට් පත්‍රයකින් වාහන ආනයනය සඳහා 50%ක අධිභාරයක් පැනවූ නමුත් එදින හෝ ඊට පෙර විවෘත කරන ලද ණයවර ලිපිවලට අදාළ වාහන ඉන් නිදහස් කර ඇති බවයි.

“ජනාධිපතිවරයා 15වැනිදා ගැසට් එක ගහන්න ලිපිය නිකුත් කරනවා. නමුත් ගැටලුව වන්නේ, මේ රටේ ප්‍රමුඛ ව්‍යාපාරිකයන් දෙදෙනෙකු මෙය කලින් දැන ගත්තේ කොහොමද?” යනුවෙන් ඔහු විමසීය.

ඔහුට අනුව, ව්‍යාපාරිකයන් දෙදෙනෙකු එකම දිනයේදී පෙර බදු අනුපාතය යටතේ අලුත්ම වාහන 4,000ක් ආනයනය කිරීම සඳහා ණයවර ලිපි (LC) විවෘත කර තිබේ.

එක් ව්‍යාපාරිකයකු වාහන 3,500ක් සඳහා ආනයන සංවිධාන කළ බවත් තවත් ව්‍යාපාරිකයකු වාහන 500ක් සඳහා ආනයනය ලබා ගත් බවටත් ඔහු චෝදනා කළේය.

බදු තීරණය පිළිබඳ ව්‍යාපාරිකයන්ට පූර්ව දැනුමක් තිබුණේ කෙසේදැයි ඔහු ප්‍රශ්න කළ අතර, ගැසට් පත්‍රය පිළිබඳ රහස්‍ය තොරතුරු ප්‍රකාශයට පත් කිරීමට පෙර කාන්දු වී තිබිය හැකි බවට ද යෝජනා කළේය.

“මගේ දැනුමට අනුව, පසුගිය සිකුරාදා රුපියල් බිලියන 40කට වඩා වටිනා LC විවෘත කරලා. මේ නිසා රුපියල අවප්‍රමාණය වුණා, මෙය වංචාවක් නෙවෙයිද? මෙය අභ්‍යන්තර ව්‍යාපාරයක් නෙවෙයිද ? මෙය භාණ්ඩාගාර වංචාවට වඩා විශාල මංකොල්ලයක් නෙවෙයිද ?” යනුවෙන් ඔහු පැවසීය.

වාහන ආනයන ණයවර ලිපි වැඩිවීම රුපියලේ මෑත අවප්‍රමාණයට දායක වූ බව පාදුක්ක චෝදනා කළ අතර, සිකුරාදා (15) දින රු. 323 සිට සඳුදා සවස වන විට රු. 334 දක්වා එක්සත් ජනපද ඩොලරය ඉහළ ගොස් ඇති බව කියා සිටියේය.

“ඩොලරය රුපියල් 11කින් ඉහළ ගියහම අපට සැකයක් ඇතිවෙනවා. අපි පරීක්ෂා කළහම වාහන 4,000ක් සඳහා ණයවර ලිපි විවෘත කරලා,” ඔහු පැවසුවේ, මේ හේතුවෙන් රාජ්‍යයට ලබාගැනීමට හැකියාව තිබූ බදු ආදායමෙන් රුපියල් බිලියන 20කට වඩා අහිමි වූ බවට චෝදනා කරමිනි.

ණයවර ලිපිවල අනුමැතිය පිළිබඳ විස්තර සොයා බැලීමට තමන් ශ්‍රී ලංකා මහ බැංකුවට ගිය බවත්, ගනුදෙනු නිරීක්ෂණය කිරීමට හෝ නැවැත්වීමට බලධාරීන් අපොහොසත් වූයේ මන්දැයි ප්‍රශ්න කළ බවත් පාදුක්ක පැවසීය.