ගල්අඟුරු ගනුදෙනු සම්බන්ධයෙන් විමර්ශනය කිරීම සඳහා පත්කරන ලද ජනාධිපති පරීක්ෂණ කොමිෂන් සභාව හෙට (ජූලි 01) සිට සාක්ෂි සටහන් කර ගැනීම ආරම්භ කිරීමට නියමිතය.

වාර්තාවන්ට අනුව, මේ වන විට කොමිසම වෙත පැමිණිලි 28ක් ලැබී ඇති අතර, එම පැමිණිලිවලට අදාළ සවිස්තරාත්මක වාර්තා ඉදිරිපත් කිරීම සඳහා පැමිණිලිකරුවන්ට ලබා දී තිබූ අවසන් දිනය අදින් අවසන් වේ.

කොමිෂන් සභාවේ ලේකම් ඩී.වී. බන්දුලසේන ප්‍රකාශ කළේ හිටපු අමාත්‍යාංශ ලේකම්වරුන් කිහිපදෙනකු සහ රාජ්‍ය නිලධාරීන් ඇතුළු පුද්ගලයන් 100කට වැඩි පිරිසකගෙන් මේ වන විටත් ප්‍රකාශ සටහන් කරගෙන ඇති බවයි.

දිවයින තුළ සිදුවූ සියලුම ගල්අඟුරු ගනුදෙනු පිළිබඳව සොයා බැලීම සඳහා ජනාධිපති අනුර කුමාර දිසානායක විසින් මෙම පූර්ණ බලැති ජනාධිපති කොමිෂන් සභාව පිහිටුවනු ලැබීය.

ශ්‍රේෂ්ඨාධිකරණ විනිසුරු ගිහාන් කුලතුංගගේ සභාපතිත්වයෙන් යුත් මෙම කොමිසමේ සෙසු සාමාජිකයන් ලෙස අභියාචනාධිකරණ විනිසුරු ආදිත්‍ය පටබැඳිගේ සහ මහාධිකරණ විනිසුරු සංජීව සෝමරත්න කටයුතු කරති.