රජයේ පාසල් පැවැත්වෙන වේලාව පස්වරු 2:00 දක්වා දීර්ඝ කිරීමද ඇතුළත් වන ලෙස රජය ඉදිරිපත් කර ඇති යෝජිත අධ්‍යාපන ප්‍රතිසංස්කරණ සඳහා අධ්‍යාපන වෘත්තීය සමිති අඛණ්ඩව විරෝධය පළකරමින් සිටියි.

ඒ අනුව ජනමාධ්‍ය හමුවේ අදහස් දක්වමින් අධ්‍යාපන වෘත්තිකයන්ගේ සංගමයේ සභාපති පූජ්‍ය උලපනේ සුමංගල හිමියන් පැවසුවේ, මෙම ප්‍රතිසංස්කරණ ඉවත් කරගන්නා ලෙස ඉල්ලා දෙසැම්බර් 12 වැනි දින වෘත්තීය සමිති රැසක සහභාගීත්වයෙන් දිවයින පුරා වැඩ වර්ජනයක් පැවැත්වීමට නියමිත බවයි.

පරිපාලනයට සහාය දක්වන වෘත්තීය සමිතිවල විරෝධතා පවා නොතකා රජය යෝජිත පාසල් වේලාව දීර්ඝ කිරීම ඉදිරියට ගෙන යන බව එම සංගමය පෙන්වාදෙයි.

පවතින විරෝධය ද සැලකිල්ලට නොගෙන, යෝජිත වෙනස්කම් සම්බන්ධයෙන් නිල චක්‍රලේඛන දැනටමත් නිකුත් කර ඇති බව ද උලපනේ සුමංගල හිමියන් සඳහන් කළේය.

රජය මෙම ප්‍රතිසංස්කරණ ඉවත් කරගැනීමට අපොහොසත් වුවහොත්, දෙසැම්බර් 12 වැනි දිනෙන් පසු රට පුරා දින නියමයක් නොමැතිව වැඩ වර්ජනයක් දියත් කිරීමට වෘත්තීය සමිති සූදානම් බව ද උන්වහන්සේ පැවසුවේය.

පාසල් පැවැත්වෙන වේලාව දීර්ඝ කිරීම සහ අනෙකුත් අධ්‍යාපන ප්‍රතිසංස්කරණ නැවත සලකා බැලිය යුතු බවත්, රජය පාර්ශ්වකරුවන්ගේ ගැටළු නොසලකා හැරීම අධ්‍යාපන ක්ෂේත්‍රයේ බරපතල බාධාවන්ට හේතු විය හැකි බවත් අධ්‍යාපන වෘත්තිකයන්ගේ සංගමයේ අවධාරණය කර සිටියි.