හිටපු ජනාධිපති ගෝඨාභය රාජපක්ෂගේ හිටපු පෞද්ගලික ලේකම්වරයකු මෙන්ම දේශපාලන ක්‍රියාකාරිකයකු වන සුගීශ්වර බණ්ඩාර ලබන ජූලි මස 08 වනදා දක්වා තවදුරටත් රිමාන්ඩ් බන්ධනාගාරගත කිරීමට කොළඹ කොටුව මහේස්ත්‍රාත් අධිකරණය අද නියෝග කළේය.

සැකකරු කොළඹ කොටුව මහේස්ත්‍රාත් පසන් අමරසේන හමුවට ඉදිරිපත් කළ අවස්ථාවේදී මෙම නියෝගය නිකුත් කෙරුණු අතර, ඔහුගේ ඇප ඉල්ලීම පිළිබඳ නියෝගය ප්‍රකාශයට පත්කිරීම ද මහේස්ත්‍රාත්වරයා විසින් ජූලි 08 වනදා දක්වා කල්තැබූ බව වාර්තා වේ.

නඩු විභාගය අතරතුරදී මධ්‍යම අපරාධ විමර්ශන කාර්යාංශය (CCIB) අධිකරණයට දැනුම්දුන්නේ, දැනට ක්‍රියාත්මක විමර්ශනවලට අදාළව හිටපු ජනාධිපති ගෝඨාභය රාජපක්ෂගෙන් ද ප්‍රකාශයක් සටහන් කරගෙන ඇති බවයි.

රාජ්‍ය ආයතන දෙකකින් එකම කාලසීමාවක් තුළ වැටුප් ලබාගත් බවට එල්ල වූ චෝදනා මත සුගීශ්වර බණ්ඩාර පසුගිය ජුනි මස 18 වනදා අත්අඩංගුවට ගෙන බන්ධනාගාරගත කර තිබිණි.