May 29, 2026
ශ්රී ලංකාවේ ණය තිරසාරභාවය තවමත් බිඳෙනසුලු මට්ටමක පැවතුණද, දැනට ක්රියාත්මක ආර්ථික ප්රතිසංස්කරණ යටතේ එය ක්රමයෙන් යහපත් වෙමින් පවතින බව අන්තර්ජාතික මූල්ය අරමුදලේ (IMF) ශ්රී ලංකා දූත මණ්ඩල ප්රධානී එවන් පැපජෝර්ජියු පවසයි.
අවදානම් තවදුරටත් පැවතුණද, රටේ සමස්ත ණය ගමන් මඟ ධනාත්මක දිශාවකට ගමන් කරමින් ඇති බව ඔහු පෙන්වා දෙයි.
රටේ මූල්ය දෘෂ්ටිය පිළිබඳ අදහස් දක්වමින් පැපජෝර්ජියු සඳහන් කළේ, ශ්රී ලංකාව අන්තර්ජාතික මූල්ය අරමුදලේ වැඩසටහනට ඇතුළත් වන විටම අතිශය ඉහළ ණය බරකින් පීඩා විඳිමින් සිටි බවයි.
කෙසේවුවද, රජය විසින් සිදු කරන ලද සැළකිව යුතු ප්රතිසංස්කරණ, විශේෂයෙන්ම දැනට අවසන් අදියරේ පවතින සවිස්තරාත්මක ණය ප්රතිව්යුහගතකරණ ක්රියාවලිය හේතුවෙන් මෙම තත්ත්වය සැළකිව යුතු ලෙස වෙනස් වී ඇති බව ඔහු අවධාරණය කළේය.
“වැඩසටහන ආරම්භයේ සිටම ශ්රී ලංකාවේ ණය මට්ටම පැවතියේ ඉතා ඉහළ අගයකයි” යනුවෙන් පැවසූ පැපජෝර්ජියු, ණය තිරසාරභාවය පිළිබඳ ගැටලුව නිරන්තරයෙන් මතු වූවක් බව පිළිගත්තේය.
එසේ වුවද, තම මූල්ය තත්ත්වය ස්ථාවර කර ගැනීමට සහ ණය බර අඩු කර ගැනීමේ මඟකට අවතීර්ණ වීමට ශ්රී ලංකාව අර්ථවත් ප්රගතියක් අත්කර ගෙන ඇති බව ඔහු පැවසීය.
අන්තර්ජාතික මූල්ය අරමුදලේ නවතම කාර්ය මණ්ඩල වාර්තාවට අනුව ණය තිරසාරභාවය පිළිබඳ අවදානම් තවමත් ඉහළ මට්ටමක පවතින නමුත්, වත්මන් ප්රතිපත්තිමය උපකල්පන යටතේ සමස්ත ණය බර පහළ යෑමේ ප්රවණතාවක් පෙන්නුම් කිරීම සුවිශේෂී වෙනසක් බව ඔහු සඳහන් කළේය.
මූල්ය විනය, ආර්ථික වර්ධනය සහ පාලනය කරන ලද උද්ධමනය යන කරුණුවල එකතුවක් මත ශ්රී ලංකාවේ ණය මට්ටම අඛණ්ඩව පහත වැටෙනු ඇති බව මූල්ය අරමුදලේ මූලික ප්රක්ෂේපණයන්ගෙන් පෙනී යන බව පැපජෝර්ජියු පෙන්වා දුන්නේය.
මෙම ගමන් මඟ ඉදිරියටම පවත්වාගෙන යෑම සඳහා රජය ප්රාථමික අයවැය අතිරික්තයක් පවත්වාගෙන යෑමට කැපවීම අත්යවශ්ය කොන්දේසියක් බව ද ඔහු ප්රකාශ කළේය.
දිගුකාලීන ආර්ථික වර්ධනයක් පවත්වා ගැනීම සහ උද්ධමනය පාලනය කර ගැනීම මෙම උපායමාර්ගයේ වැදගත් කොටස් වන අතර, ශ්රී ලංකාව ලබා ඇති මෙම ජයග්රහණ ස්ථාවර කර ගත හැක්කේ අඛණ්ඩ ප්රතිපත්තිමය ක්රියාත්මක කිරීම් මත පමණක් බව ද හෙතෙම වැඩිදුරටත් කියා සිටියේය.
