පාකිස්ථානය තුළ වෙසෙන ඇෆ්ගනිස්ථාන සරණාගතයින් ඉලක්ක කරගනිමින් එරට ආරක්ෂක අංශ සිදුකරන වැටලීම්, අත්අඩංගුවට ගැනීම් සහ බලහත්කාරයෙන් පිටුවහල් කිරීම් සීඝ්‍රයෙන් ඉහළ ගොස් ඇති බව හියුමන් රයිට්ස් වොච් සංවිධානය නිකුත් කළ නවතම වාර්තාවක දැක්වේ.

පොලිසිය විසින් ප්‍රධාන නගර රැසක මධ්‍යම රාත්‍රී කාලයේ හදිසි නිවාස පරීක්ෂාවන් සිදුකරන අතර, නීත්‍යානුකූල වීසා සහ ලේඛන ඇති පුද්ගලයින් පවා මෙලෙස අත්අඩංගුවට ගෙන ඇත.

වාර්තාවට අනුව, 2026 වසර ආරම්භයේ සිට මේ දක්වා කාලය තුළ පමණක් ඇෆ්ගන් ජාතිකයින් 1,46,000 කට අධික සංඛ්‍යාවක් පාකිස්ථානයෙන් ආපසු හරවා යවා තිබේ.

මේ පිළිබඳව අදහස් දක්වන හියුමන් රයිට්ස් වොච් සංවිධානයේ ඇෆ්ගනිස්ථාන කලාපීය පර්යේෂිකා ෆෙරෙෂ්තා අබ්බාසි සඳහන් කරන්නේ, පාකිස්ථාන බලධාරීන් සරණාගතයින්ට ආරක්ෂාව ලබා දෙනවා වෙනුවට ඔවුන් තුළ අනියත බියක් ඇති කරමින් සිටින බවයි.

පොලිසියේ මෙම පීඩාකාරී හැසිරීම හේතුවෙන් ජනතාවට මූලික ආහාර සපයා ගැනීමට මෙන්ම සෞඛ්‍ය පහසුකම් ලබා ගැනීමට පවා නොහැකි වී ඇති බව ඇය වැඩිදුරටත් පැවසුවාය.

අත්අඩංගුවට පත්වීමේ පවතින දැඩි බිය නිසා අසනීප තත්ත්වයන්හිදී පවා රෝහල් වෙත යාමට සරණාගතයින් මැලි වන බව වාර්තාව සඳහන් කරයි.

එසේම, 2021 වසරේ ඇෆ්ගනිස්ථානයේ සිදුවූ දේශපාලන පෙරළියත් සමඟ පලා ආ මාධ්‍යවේදීන් ද මෙම අත්අඩංගුවට ගැනීම්වලට ගොදුරු වී ඇත. ඇතැම් පවුල්වල දෙමාපියන්ගෙන් දරුවන් වෙන්කර, කුඩා ළමුන් පමණක් තනිවම ඇෆ්ගනිස්ථානයට පිටුවහල් කළ අවස්ථා ද වාර්තා වී තිබේ.

සරණාගතයින් මෙලෙස ඔවුන්ගේ කැමැත්තෙන් තොරව ආපසු හරවා යැවීම මගින්, යම් පුද්ගලයෙකු අනතුරක් සහිත ස්ථානයකට ආපසු නොයැවීමේ ජාත්‍යන්තර නීතිමය පිළිගැනීම පාකිස්ථානය විසින් සෘජුවම උල්ලංඝනය කරන බව හියුමන් රයිට්ස් වොච් සංවිධානය පෙන්වා දෙයි.