ලෝක වෙළඳපොළේ බොරතෙල් බැරලයක මිල ඇමෙරිකානු ඩොලර් 116 ඉක්මවා යාම, ඉන්ධන ආනයන වියදම අධික ලෙස ඉහළ යෑම සහ විදේශ සංචිත මට්ටම් සැලකිල්ලට ගනිමින් රාජ්‍ය ආයතන සඳහා පිකප් රථ (Pick-up trucks) 1,750ක් මිලදී ගැනීමේ සැලසුම තාවකාලිකව අත්හිටුවීමට රජය තීරණය කර ඇති බව ජනාධිපති අනුර කුමාර දිසානායක ප්‍රකාශ කළේය.

බාහිර ආර්ථික කම්පනයන්ට මුහුණ දීම සඳහා ශක්තිමත් ආර්ථික ස්ථාවරත්වයක් පවත්වා ගැනීමේ අවශ්‍යතාව පෙන්වා දෙමින් ජනාධිපතිවරයා පැවසුවේ, රජයට මුදල් නොමැතිව රට බංකොලොත් වූ අතීත අත්දැකීම් පිළිබඳව අවධානය යොමුකරමින් මෙම තීරණය ගත් බවයි.

රජයේ මිනින්දෝරුවන්ගේ සියවස් පූර්ණ සංවත්සර උත්සවය අමතමින් ජනාධිපතිවරයා සඳහන් කළේ, 2025 වසර පුරාම ඉන්ධන ආනයනය සඳහා වැයවූයේ ඇමෙරිකානු ඩොලර් බිලියන 4ක් වුවද, 2026 වසරේ අගෝස්තු වන විටත් එම ඩොලර් බිලියන 4ක මුදල වැය වී අවසන් බවයි. එම නිසා මෙම වසර අවසාන වන විට සමස්ත ඉන්ධන ආනයන වියදම ඩොලර් බිලියන 6 දක්වා ඉහළ යනු ඇතැයි අපේක්ෂා කෙරේ.

2027 අයවැය මගින් ප්‍රාග්ධන වියදම් සඳහා රුපියල් ට්‍රිලියන 2ක් වෙන්කර ඇති අතර, එය 2026 වසරේ වෙන්කළ රුපියල් ට්‍රිලියන 1.3ට වඩා වැඩි අගයකි. ප්‍රාග්ධන සංවර්ධන ව්‍යාපෘති සඳහා යන්ත්‍රසූත්‍ර සහ අමුද්‍රව්‍ය ආනයනය කිරීමට සිදුවන බැවින් ඩොලර් සඳහා ඇති ඉල්ලුම සහ පීඩනය තවදුරටත් ඉහළ යන බව ජනාධිපතිවරයා පෙන්වාදුන්නේය.

කැලණිවැලි දුම්රිය මාර්ගය විදුලි සංග්‍රාමී කිරීම සඳහා වැය වන රුපියල් බිලියන 600ක මුදල මෙන්ම කුරුණෑගල-ගලේවෙල, රඹුක්කන-ගලගෙදර සහ කහතුඩුව-ඉංගිරිය අධිවේගී මාර්ග ව්‍යාපෘති දේශීය අරමුදල් මගින් ක්‍රියාත්මක කිරීමට සැලසුම් කර ඇත.

මහ බැංකු වාර්තාවලට අනුව 2026 අගෝස්තු වන විට මෝටර් රථ ආනයනය සඳහා ඩොලර් බිලියන 1.684ක් වැය වී ඇති අතර, ශ්‍රී ලාංකිකයන් විදේශ සංචාර සඳහා ඩොලර් මිලියන 815.2ක් වැය කර තිබේ. මෙම තත්ත්වය හමුවේ ඩොලර් උපයන මාර්ග වැඩි කිරීමට සහ ඩොලර් පිටතට ගැලීම පාලනය කිරීමට 2027 අයවැය මගින් වැඩි අවධානයක් යොමුකරන බව ජනාධිපතිවරයා වැඩිදුරටත් පැවසීය.