ස්ථාවර නියෝග සහ ආණ්ඩුක්‍රම ව්‍යවස්ථාවෙන් සපයා ඇති ප්‍රතිපාදන පරිදි නව මන්ත්‍රීවරුන් දිවුරුම්දීමෙන් සහ ප්‍රතිඥාදීමෙන් අනතුරුව නව කථානායකවරයකු තෝරා පත්කර ගැනීමට පාර්ලිමේන්තුව හෙට (17) රැස්වන බව පාර්ලිමේන්තු මහලේකම් කුෂානි රෝහණධීර නිවේදනය කළාය.

නියෝජ්‍ය කථානායක වෛද්‍ය රිස්වි සාලිගේ ප්‍රධානත්වයෙන් පාර්ලිමේන්තු කටයුතු පිළිබඳ කාරක සභාව අද (16) රැස්වූ අවස්ථාවේදී මේ සම්බන්ධයෙන් සාකච්ඡා කෙරිණි.

දෙසැම්බර් 17 සහ 18 යන දෙදිනට අදාළව මීට පෙර තීරණය කරන ලද සභාවේ කටයුතුවලට ද සංශෝධන කිහිපයක් සිදුකර ඇති බව එම නිවේදනයේ සඳහන් වේ.

ඒ අනුව, දෙසැම්බර් 17 වැනි අඟහරුවාදා පෙරවරු 9.30 සිට පෙරවරු 9.45 දක්වා නව මන්ත්‍රීවරුන් සඳහා නිල දිවුරුම්දීම වෙනුවෙන් කාලය ලබා දී ඇත.

සමගි ජන බලවේගයේ ජාතික ලැයිස්තුවෙන් නම්කළ මන්ත්‍රීවරුන් තිදෙනෙකු සහ නව ප්‍රජාතන්ත්‍රවාදී පෙරමුණේ ජාතික ලැයිස්තුවෙන් නම්කළ මන්ත්‍රීවරයෙකු ඒ අනුව දිවුරුම් දීමට නියමිතය.

ඉන් අනතුරුව නව කථානායකවරයකු තෝරා පත්කර ගැනීම සඳහා පාර්ලිමේන්තුව කටයුතු කරනු ඇත.

ඉන් අනතුරුව පාර්ලිමේන්තු මන්ත්‍රීවරුන්ට වාචික පිළිතුරු සඳහා ප්‍රශ්න ඇසීමට අවස්ථාව ලබා දෙන බව එම නිවේදනයේ දැක්වේ.