අන්තර්ජාතික සංවිධානයක් විසින් වසර දෙකකට අධික කාලයක් තිස්සේ දෙපාර්තමේන්තුවේ නම උපයෝගී කරගනිමින් මූල්‍ය වංචා සිදු කරමින් සහ තැපැල් ගනුදෙනුකරුවන්ගෙන් විදේශ මුදල් වංචා කරමින් සිටින බව ශ්‍රී ලංකා තැපැල් දෙපාර්තමේන්තුව අනාවරණ කර තිබේ.

තැපැල්පති රුවන් සත්කුමාර ප්‍රකාශ කළේ දේශීයව සහ අන්තර්ජාතිකව මාර්ගගත මිලදී ගැනීම් හරහා ක්‍රියාත්මක වන එම වංචනික කණ්ඩායම තවමත් හඳුනාගෙන නොමැති අතර වංචා කරන ලද මුළු විදේශ මුදල් ප්‍රමාණය තීරණය කිරීමට දැනට නොහැකි වී ඇති බවයි.

මෙම වංචාව යටතේ සිදුවන්නේ සාමාන්‍යයෙන් ගනුදෙනුකරුවන්ට මාර්ගගත පාර්සලයක් ලබා ගැනීම සඳහා බොහෝ විට රු. 100ට අඩු කුඩා මුදලක් ගෙවන ලෙස ඉල්ලා කෙටි පණිවුඩයක් ලැබීමයි.

ගනුදෙනුකරුගේ බැංකුව හරහා ගෙවීම සිදු කළ පසු, වංචාකරුවන් බැංකු ගිණුම් තොරතුරු පිටපත් කර ගනී.

මෙම කණ්ඩායම ශ්‍රී ලංකා තැපැල් දෙපාර්තමේන්තුවේ නිල වෙබ් අඩවියට සමාන ව්‍යාජ වෙබ් අඩවි ද නිර්මාණය කර තිබේ.

ඔවුන් අනවසර ගනුදෙනු සිදු කිරීම සඳහා OTP කේත ද භාවිත කරන බව දැනගන්නට තිබේ.

මෙම වංචාව හරහා හඳුනාගත් මූල්‍ය අලාභයන්ට අමෙරිකානු ඩොලර්, ඕස්ට්‍රේලියානු ඩොලර්, සිංගප්පූරු ඩොලර්, ස්විස් ෆ්‍රෑන්ක් සහ බ්‍රිතාන්‍ය පවුම් ඇතුළු විදේශ මුදල් ඇතුළත් වේ.

ශ්‍රී ලංකා මහ බැංකුවේ විමර්ශන ඒකකය, පරිගණක හදිසි ප්‍රතිචාර කණ්ඩායම (SART) සහ අපරාධ පරීක්ෂණ දෙපාර්තමේන්තුවේ පරිගණක අපරාධ අංශයට මේ සම්බන්ධයෙන් දැනුම් දී ඇත.

වසර දෙකකට වැඩි කාලයක් තිස්සේ සිදුවෙමින් පවතින මෙම වංචාව සම්බන්ධයෙන් දෙපාර්තමේන්තුවට සැළකිව යුතු පැමිණිලි සංඛ්‍යාවක් ලැබී ඇති බව තැපැල් දෙපාර්තමේන්තුවේ තාක්ෂණික අංශයේ නියෝජ්‍ය අධ්‍යක්ෂ චම්මි විජිතපාල තහවුරු කළාය.

දෙපාර්තමේන්තුව මාර්ගගත ගෙවීම් සඳහා පහසුකම් ලබා නොදෙන බැවින්, ණය හෝ හර කාඩ්පත් භාවිත කරමින් තැපැල් දෙපාර්තමේන්තුව හරහා කිසිදු මාර්ගගත ගෙවීමක් නොකරන ලෙස තැපැල්පති සත්කුමාර සහ නියෝජ්‍ය අධ්‍යක්ෂ විජිතපාල සියලුම තැපැල් ගනුදෙනුකරුවන්ගෙන් ඉල්ලා සිටිති.