මහජන නඩු පවරන අධ්‍යක්ෂ කාර්යාලයක් පිහිටුවීමට අදාළ යෝජනාවට නීතිපති දෙපාර්තමේන්තුවේ නීති නිලධාරීන්ගේ සංගමය නිලවශයෙන් විරුද්ධ වී තිබේ.

එවැනි පියවරක් දෙපාර්තමේන්තුවේ ස්වාධීනත්වය, කාර්යක්ෂමතාව සහ වෘත්තීය ප්‍රමිතීන්ට හානි කරන බව එම සංගමය අවධාරණය කර ඇත.

නීතිපති දෙපාර්තමේන්තුව තුළ ස්වාධීනත්වය, විනිවිදභාවය සහ කාර්යක්ෂමතාව වැඩි දියුණු කිරීම අරමුණු කරගත් පියවරවලට සම්පූර්ණයෙන්ම සහාය දෙන අතර, වෙනම නඩු පවරන කාර්යාලයක් නිර්මාණය කිරීම දැඩි ලෙස ප්‍රතික්ෂේප කරන බව අවධාරණය කරමින් එම සංගමය 2025 නොවැම්බර් 14 වැනිදා පැවති විශේෂ මහා සභා රැස්වීමකදී යෝජනාවක් ඒකමතිකව සම්මත කර ගත්තේය.

ස්වාධීනත්වය, විනිවිදභාවය වැඩි දියුණු කිරීම සහ අපරාධ යුක්ති ක්‍රියාවලිය කඩිනම් කිරීම සඳහා යැයි කියනු ලබන මහජන නඩු පවරන අධ්‍යක්ෂ කාර්යාලයක් සළකා බැලීමට පියවර ගනිමින් සිටින බව සංගමය නිරීක්ෂණය කර තිබිණි.

කෙසේවෙතත්, නඩු පවරන කාර්යය දෙපාර්තමේන්තුවෙන් වෙන් කිරීම සාධාරණීකරණය කිරීමට කිසිදු ප්‍රායෝගික හෝ විද්‍යාත්මක සාක්ෂි ඉදිරිපත් කර නොමැති බව එම සංගමය කියයි.

ස්වාධීනත්වය සහ විනිවිදභාවය නඩු පවරන කටයුතු සඳහා පමණක් නොව, එහි සිවිල් අංශය ඇතුළුව නීතිපති දෙපාර්තමේන්තුවේ අනෙකුත් සියලුම කාර්යයන් සඳහා ද අදාළ විය යුතු බව සංගමය තවදුරටත් අවධාරණය කළේය.

දෙපාර්තමේන්තුව බෙදීම ස්වාධීනත්වය ඛාදනය කිරීමට, වෘත්තීය ප්‍රමිතීන් හීන කිරීමට සහ මෙහෙයුම් අකාර්යක්ෂමතාවන්ට දායක විය හැකි බවට සංගමය අනතුරු ඇඟවීය.

යෝජිත වෙන්වීම ‘අසාධාරණ, අත්තනෝමතික, කිසිදු තාර්කික පදනමක් හෝ කුසලතාවකින් තොර සහ අවසානයේ ඵලදායක නොවනු’ වනු ඇති බවට නිගමනය කරන එම සංගමය, දෙපාර්තමේන්තුවේ මෙහෙයුම් ශක්තිමත් කිරීම සඳහා නිර්මාණය කර ඇති අභ්‍යන්තර ප්‍රතිසංස්කරණවලට සහාය දැක්වීමට සිය කැපවීම නැවත තහවුරු කළේය.