July 7, 2025
ජෙනරාල් ශ්රීමත් ජෝන් කොතලාවල ආරක්ෂක විශ්වවිද්යාලයේ වෛද්ය උපාධිය සඳහා දේශීය සිසුන් ඇතුළත් කර නොගැනීමට ගත් තීරණය ක්රියාත්මක කිරීම වළක්වන අතුරු තහනම් නියෝගයක් ඉල්ලා සිසුන් පිරිසක් ගොනුකළ මූලික අයිතිවාසිකම් පෙත්සමේ පෙත්සම්කරුවන් සහ වගඋත්තරකරුවන් වෙනුවෙන් පෙනීසිටින නීතීඥවරු නඩුව සාධාරණ ලෙස විසඳාගත හැකි බව අද ශ්රේෂ්ඨාධිකරණයට දන්වා තිබේ.
අගවිනිසුරු මුර්දු ප්රනාන්දු සහ විනිසුරු මහින්ද සමයවර්ධන සහ මේනකා විජේසුන්දර යන ත්රිපුද්ගල ශ්රේෂ්ඨාධිකරණ විනිසුරු මඩුල්ල හමුවේ මෙම පෙත්සම අද විභාගයට ගැණිනි.
පෙත්සම්කරුවන් වෙනුවෙන් පෙනීසිටි නීතීඥ හෆිල් ෆාරිස් විනිසුරු මඩුල්ල හමුවේ කියාසිටියේ, නඩුව සාමකාමීව විසඳාගැනීමේ හැකියාව පවතින බවයි.
එමෙන්ම ඔහු ප්රකාශ කළේ, දේශීය සිසුන්ට නැවත වරක් විශ්වවිද්යාල වෛද්ය පීඨයට ඇතුළත් කර ගැනීමට අවසර දෙමින් වගඋත්තරකරුවන් ප්රකාශයක් නිකුත් කර ඇති බවයි.
ඒ අනුව, අදාළ කරුණු සම්බන්ධයෙන් තම සේවාදායකයන්ගෙන් ලබාගත් ලිඛිත උපදෙස් ඉදිරිපත් කිරීමට සහ අදාළ කරුණු දැක්වීමට දිනයක් ලබාදෙන ලෙස ඔහු අධිකරණයෙන් ඉල්ලා සිටියේය.
නීතිපතිවරයා වෙනුවෙන් පෙනීසිටි නියෝජ්ය සොලිසිටර් ජනරාල් නිර්මලන් විග්නේෂ්වරන් ද එම ඉල්ලීමට එකඟ විය.
එබැවින් බේරුම්කරණයට අදාළ ලිඛිත උපදෙස් ඉදිරිපත් කිරීමට පෙත්සම්කරුවන්ට කල් ලබාදෙමින් විනිසුරු මඩුල්ල නඩුව ජූලි 24 වැනිදා යළි කැඳවීමට නියම කර තිබේ.
ෆාතිමා අබ්දුල් ෆලීල් සහ දුලංක ද සිල්වා ඇතුළු සිසුන් පස්දෙනෙකු විසින් මෙම පෙත්සම ගොනුකර තිබූ අතර එහි වගඋත්තරකරුවන් ලෙස ජෙනරාල් ශ්රීමත් ජෝන් කොතලාවල ආරක්ෂක විශ්වවිද්යාලයේ පාලක මණ්ඩලය ඇතුළු පාර්ශව කිහිපයක් නම්කර තිබේ.
2025/26 අධ්යයන වර්ෂය සඳහා විශ්වවිද්යාලයෙන් වෛද්ය උපාධියක් හැදෑරීමට බලාපොරොත්තුවෙන් සිටි බව පෙත්සම්කරුවෝ ප්රකාශ කළහ.
2024 දී ගන්නා ලද කැබිනට් තීරණයකට අනුව දේශීය සිසුන්ට මුදල් ගෙවා විශ්වවිද්යාලයෙන් වෛද්ය උපාධිය හැදෑරීමට අවසර දීමට තීරණය කර තිබූ බැවින්, ඒ අනුව ඊට ඇතුළත්වීමට තමන් බලාපොරොත්තු වූ බවත් ඔවුන් සඳහන් කර තිබේ.
කෙසේවෙතත්, දේශීය සිසුන් හැර විදේශීය සිසුන් සහ කැඩෙට් නිලධාරීන් පමණක් වෛද්ය උපාධි පාඨමාලාව සඳහා ඇතුළත් කිරීමට තීරණය කර ඇති බව ආරක්ෂක නියෝජ්ය අමාත්ය මේජර් ජෙනරාල් අරුණ ජයසේකර (විශ්රාමික) පාර්ලිමේන්තුවේදී ප්රකාශ කළ බව පෙත්සම්කරුවෝ පෙන්වාදුන්හ.
ඔවුන් වැඩිදුරටත් කියාසිටියේ වෛද්ය උපාධි පාඨමාලාවට දේශීය සිසුන් ඇතුළත් කර නොගන්නා බවට විශ්වවිද්යාල නිල වෙබ් අඩවිය පසුව නිවේදනය කර ඇති බවයි.
මේ තුළින් අදාළ විශ්වවිද්යාලයේ වෛද්ය උපාධිය හැදෑරීමට අපේක්ෂාවෙන් සිටි තමන්ට දැඩි අසාධාරණයක් සිදුවන අතර, මේ තුළින් සිය මූලික මිනිස් අයිතිවාසිකම් උල්ලංඝනය වන බවට තීන්දුවක් ලබාදෙන ලෙස පෙත්සම්කරුවන් ශ්රේෂ්ඨාධිකරණයෙන් ඉල්ලා තිබිණි.
