June 30, 2026
ප්රදේශවාසීන්ගෙන් ලැබුණු පැමිණිලි සලකා බලා කඩුවෙල මහනගර සභා බලප්රදේශය පුරා මාර්ග දෙපස ගොඩගැසී ඇති කසළ ඉවත් කිරීමට අවශ්ය පියවර ගැනීම නගර සභාව විසින් මේ වන විට ආරම්භ කර ඇති බව නගරාධිපති රන්ජන් ජයලාල් පවසයි.
සති තුනකට ආසන්න කාලයක සිට ඇතැම් ප්රදේශවල කසළ එකතු කිරීමේ රථ වාහන ධාවනය නොවීම හේතුවෙන් පොදු ස්ථානවල විශාල වශයෙන් කසළ රැස්වී ඇති බවට එල්ල වූ චෝදනාවලට පිළිතුරු දෙමින් නගරාධිපතිවරයා මේ බව සඳහන් කළේය.
දිවයින පුරා ඩෙංගු රෝගීන්ගේ ශීඝ්ර වර්ධනයක් පවතින පසුබිමක මෙම කසළ ගැටලුව දැඩි මහජන කනස්සල්ලට හේතු වී තිබේ.
තම අවට පරිසරය පිරිසිදුව තබා ගනිමින් සහ ජලය රැඳෙන ස්ථාන විනාශ කරමින් මදුරුවන් බෝවන ස්ථාන තුරන් කරන ලෙස සෞඛ්ය අංශ ද ජනතාවගෙන් දිගින් දිගටම ඉල්ලා සිටියි.
මේ අතර, ඩෙංගු අවදානම ඉහළම දිස්ත්රික්කයක් වන කොළඹ දිස්ත්රික්කය තුළ පවතින වැසි සහිත කාලගුණයත් සමඟ මෙලෙස කසළ කළමනාකරණය නිසි පරිදි සිදුනොවීම මදුරුවන් බෝවීමේ අවදානම තවත් තීව්ර කර ඇති බව බලධාරීහු පවසති.
ප්රදේශවාසීන්ට තම නිවෙස් සහ පෞද්ගලික ඉඩම් පිරිසිදුව තබා ගැනීමට හැකි වුවද, විශාල වශයෙන් එකතු වන ඝන අපද්රව්ය එකතු කිරීම සහ බැහැර කිරීම ප්රාදේශීය බලධාරීන්ගේ වගකීමක් බව ද ජනතාව පෙන්වාදෙති.
මාර්ග දෙපස කසළ ගොඩගැසී තිබීම සහ වර්ෂාව හේතුවෙන් එම කසළ ගොඩවල් අවට ජලය රැඳීම නිසා කඩිනමින් මෙම සේවාවන් යථා තත්ත්වයට පත්නොකළ හොත් ඩෙංගු රෝගය ව්යාප්ත වීමේ දැඩි අවදානමක් පවතින බව සෞඛ්ය බලධාරීහු වැඩිදුරටත් අවධාරණය කරති.
