ඇමරිකා එක්සත් ජනපදය සමඟ පවතින යුද්ධය අවසන් කිරීමට සහ හෝමූස් සමුද්‍ර සන්ධිය නැවත විවෘත කිරීමට ඉරානය ඉදිරිපත් කළ යෝජනාව සාධාරණ මෙන්ම පරිත්‍යාගශීලී එකක් බව එරට විදේශ අමාත්‍යාංශ ප්‍රකාශක ඉස්මයිල් බගායි ප්‍රකාශ කළේය.

ඇමරිකාව තවදුරටත් අසාධාරණ සහ ඒකපාර්ශ්වික ඉල්ලීම් ඉදිරිපත් කරමින් සිටින බවද ඔහු වැඩිදුරටත් පැවසීය.

“අපගේ ඉල්ලීම සාධාරණයි – එනම් යුද්ධය අවසන් කිරීම, (ඇමරිකානු) අවහිර කිරීම් සහ කොල්ලකෑම් නතර කිරීම සහ ඇමරිකානු බලපෑම් මත අසාධාරණ ලෙස බැංකුවල අත්හිටුවා ඇති ඉරාන දේපළ නිදහස් කිරීම අපගේ ඉල්ලීමයි,” යනුවෙන් බගායි පැවසීය.

හෝමූස් සමුද්‍ර සන්ධිය හරහා ආරක්ෂිත ගමනාගමනය තහවුරු කිරීම සහ කලාපයේ මෙන්ම ලෙබනනයේ ආරක්ෂාව ස්ථාපිත කිරීම ඉරානයේ අනෙකුත් ඉල්ලීම් වූ අතර, ඒවා කලාපීය ආරක්ෂාව වෙනුවෙන් ඉදිරිපත් කළ පරිත්‍යාගශීලී සහ වගකිවයුතු යෝජනා ලෙස සැලකේ.

ඉරානයේ ඉල්ලීම් ඇමරිකානු ජනාධිපති ඩොනල්ඩ් ට්‍රම්ප් විසින් වහාම ප්‍රතික්ෂේප කිරීමෙන් පසුව මෙම අදහස් පළ විය.

“මම ඒකට කැමති නැහැ. එය සම්පූර්ණයෙන්ම පිළිගත නොහැකියි,” යනුවෙන් වැඩිදුර තොරතුරු අනාවරණය නොකරමින් ට්‍රම්ප් තම ‘Truth Social’ ගිණුමේ සටහනක් තබා තිබුණි.

ඉරානයේ න්‍යෂ්ටික වැඩසටහන වැනි වඩාත් මතභේදාත්මක කරුණු පිළිබඳ සාකච්ඡා ආරම්භ කිරීමට පෙර සටන් විරාමයක් ඇති කර ගැනීමට ඇමරිකාව යෝජනා කර තිබුණි.

යුද හානි සඳහා වන්දි ගෙවන ලෙසත්, හෝමූස් සමුද්‍ර සන්ධිය සම්බන්ධයෙන් ඉරානය සතු ස්වෛරීභාවය පිළිගන්නා ලෙසත් ටෙහෙරානය සිය ඉල්ලීම්වලට ඇතුළත් කළ බව ඉරාන රාජ්‍ය රූපවාහිනිය වාර්තා කළේය.

මෙම අර්බුදය තවදුරටත් පවතින බැවින් හෝමූස් සමුද්‍ර සන්ධිය දිගින් දිගටම වසා තැබීමට සිදුවන බවට ලැබුණු පුවත් සමඟ, අද දිනයේදී ලෝක වෙළඳපොලේ තෙල් මිල සියයට 3.5කට වඩා වැඩි ප්‍රමාණයකින් ඉහළ ගියේය.