වසර 14කට ආසන්න කාලයක් සිරියාවේ පැවැති යුද සමයේදී සිදුකරන ලද අපරාධ සම්බන්ධයෙන් වරදකරුවන් වූ හිටපු ජනාධිපති බෂාර් අල්-අසාද්, ඔහුගේ සොහොයුරු මහේර් අල්-අසාද් සහ ඥාති සොහොයුරු අතෙෆ් නජීබ් යන අයට දමස්කස් හි අපරාධ අධිකරණය මඟින් මරණ දඬුවම නියම කර තිබේ.

2024 වසරේදී බලයෙන් පහකෙරී මේ වන විට රුසියාවේ සෙවණ ලබන බෂාර් අල්-අසාද්ට එරෙහිව පූර්ව සැලසුම් සහගත මිනීමැරුම්, වධහිංසා පැමිණවීම් සහ මානව වර්ගයාට එරෙහි අපරාධ සම්බන්ධයෙන් චෝදනා එල්ල වී තිබූ අතර, අධිකරණය හමුවේ පෙනීනොසිටි පසුබිමක මෙම මරණ දඬුවම් තීන්දුව ලබා දී ඇත. රුසියාවේ වෙසෙන ඔහුගේ බාල සොහොයුරු මහේර් අල්-අසාද්ට ද මෙලෙසම මරණ දඬුවම නියම කෙරිණි.

මීට අමතරව, පසුගිය වසරේ ජනවාරි මාසයේදී අත්අඩංගුවට පත් වූ සිරියාවේ දේරා ප්‍රදේශයේ හිටපු දේශපාලන ආරක්ෂක ප්‍රධානී අතෙෆ් නජීබ්ට ද මානව වර්ගයාට එරෙහි අපරාධ වෙනුවෙන් මරණ දඬුවම හිමිවිය. 2011 වසරේදී දේරා හි විරෝධතාකරුවන්ට එරෙහිව මාරාන්තික මර්දනයක් දියත් කරමින් සිරියානු සිවිල් යුද්ධයට මග පෑදූ පුද්ගලයා වන්නේ මොහුය. වයස අවුරුදු 15ට අඩු ළමුන් ඝාතනය කිරීම සහ වධදී මරාදැමීම ඇතුළු චෝදනා රැසකට ඔහු වරදකරු විය.

සිරියාවේ පරිවර්තනීය පාලන අධිකරණය මඟින් හිටපු රජයේ බලධාරීන්ට එරෙහිව ලබාදුන් පළමු ප්‍රධාන තීන්දුව මෙය වේ. බෂාර් අල්-අසාද් රාජ්‍ය ආයතන අවභාවිත කරමින් මෙම අපරාධ සඳහා උපදෙස් දුන් ප්‍රධානතම තීරකයා බව සාක්ෂි මඟින් තහවුරු වූ බව විනිසුරුවරයා පැවසීය.

වසර ගණනාවක් තිස්සේ සාධාරණය ඉටුවන තෙක් මගබලා සිටි සිරියානු ජනතාවට මෙම අධිකරණ තීන්දුව මහත් සැනසීමක් සහ අස්වැසිල්ලක් වී ඇති බව විදෙස් ජනමාධ්‍ය වාර්තා කරයි.