October 8, 2024
ශ්‍රී ලංකා පොදුජන පෙරමුණෙන් බිඳී ගිය පාර්ලිමේන්තු මන්ත්‍රීවරුන්ගෙන් සැදුම්ලත් පොදුජන එක්සත් නිදහස් පෙරමුණ ඉදිරි මහ මැතිවරණයේ දී නව ප්‍රජාතන්ත්‍රවාදී පෙරමුණ යටතේ පිළිගත් දේශපාලන පක්ෂ සහ කණ්ඩායම් 10කට වැඩි සංඛ්‍යාවක් සමග එකමුතු වී ‘ගෑස් සිලින්ඩරය’ ලකුණ යටතේ තරග කරන බව නිවේදනය කරයි.
ඊයේ (7) පැවති මාධ්‍ය හමුවකදී අදහස් දැක්වූ හිටපු ඇමැති කාංචන විජේසේකර සඳහන් කළේ පොදුජන එක්සත් නිදහස් පෙරමුණ පුළුල් සන්ධානයක් පිහිටුවා ගනිමින් සියලුම මැතිවරණ දිස්ත්‍රික්ක සඳහා තරඟ කරන බවයි.
හිටපු ජනාධිපති රනිල් වික්‍රමසිංහට සහාය දුන් සියලුම දේශපාලන බලවේග මෙම සන්ධානයේ කොටස්කරුවන් වනු ඇතැයි විජේසේකර පැවසීය.
විශ්වසනීය විකල්පයක් ඉදිරිපත් කිරීම සඳහා පක්ෂ කිහිපයක බලවේග එක්කර ශක්තිමත් පෙරමුණක් ගොඩනැගීමේ ඒකාබද්ධ ප්‍රයත්නය මහ මැතිවරණයේදී මෙම සන්ධානය නියෝජනය කරන බව ද ඔහු අවධාරණය කළේය.
කෙසේවෙතත්, එළඹෙන පළාත් පාලන සහ පළාත් සභා මැතිවරණ සඳහා පොදුජන එක්සත් නිදහස් පෙරමුණ විසින් නව ප්‍රජාතන්ත්‍රවාදී පෙරමුණ භාවිත නොකරන බව විජේසේකර ප්‍රකාශ කළේය.
එම මැතිවරණ සඳහා කුසලානය ලකුණ යටතේ ස්වාධීනව තරඟ කරන බව ඔහු පැහැදිලි කළේය.
මහ මැතිවරණයෙන් පසුව, මෙම පළාත් පාලන මැතිවරණවලදී පක්ෂය නියෝජනය කරන නායකයන් පත්කරමින් මැතිවරණ කොට්ඨාස මට්ටමින් සිය පැවැත්ම ශක්තිමත් කිරීමට පොදුජන එක්සත් නිදහස් පෙරමුණ සැලසුම් කර ඇති බව ඔහු සඳහන් කළේය.
පක්ෂය වඩාත් ඵලදායී ලෙස සංවිධානය කිරීමටත් බිම් මට්ටමේ තරඟ කිරීමට ප්‍රධාන අපේක්ෂකයන් හඳුනා ගැනීමටත් අදහස් කරන බව ද විජේසේකර වැඩිදුරටත් පැවසීය.
මේ අතර, පොදුජන එක්සත් නිදහස් පෙරමුණේ ප්‍රධාන ලේකම්, හිටපු ඇමැති වෛද්‍ය රමේෂ් පතිරණ ද සන්ධානයේ ව්‍යුහය පිළිබඳ විස්තරයක් කළේය.
හිටපු ඇමැති ඩග්ලස් දේවානන්දගේ ඊළාම් ජනතා ප්‍රජාතන්ත්‍රවාදී පක්ෂය හෙවත් ඊපීඩීපී සහ එස් වියාලේන්ද්‍රන් ප්‍රමුඛ කණ්ඩායම ඇතුළු ඇතැම් පක්ෂ තෝරාගත් දිස්ත්‍රික්ක සඳහා ස්වාධීනව තරඟ කරන බව ඔහු ප්‍රකාශ කළේය.
එසේ වුවද මෙම පක්ෂ පුළුල් දේශපාලන සහයෝගීතාව සහතික කරමින් නව ප්‍රජාතන්ත්‍රවාදී පෙරමුණේ සන්ධානය සමඟ පෙළගැසෙනු ඇති බව ඔහු සඳහන් කළේය.
මේ අතර, එක්සත් ජාතික පක්ෂයේ නිලධාරියකු ප්‍රකාශ කර තිබුණේ මහ මැතිවරණයට තරඟ කරන සන්ධාන සහ ලකුණ සම්බන්ධයෙන් තවමත් අවසන් තීරණයක් ගෙන නොමැති බවයි.
