වොෂින්ටන් නුවර මෑතකදී පැවැති සමුළුවකදී ශ්‍රී ලංකාව විසින් කොළඹ වරාය සංවර්ධනය සහ ඊට ඒකාබද්ධ යටිතල පහසුකම් ප්‍රවර්ධනය සඳහා ඇමෙරිකානු ආයෝජන ඉල්ලා ඇති බව වරාය හා ගුවන් සේවා නියෝජ්‍ය අමාත්‍ය ජනිත කොඩිතුවක්කු ප්‍රකාශ කළේය. සැපයුම් කළමනාකරණ උද්‍යානයක් (Logistics Park) සහ බටහිර බහාලුම් පර්යන්තය-2 (WTC 2) සංවර්ධනය කිරීමට රජය සැලසුම් කර ඇති අතර, කොළඹ වරාය ශ්‍රී ලංකාවේ විශාලතම උපායමාර්ගික සම්පතක් බව ඔහු පෙන්වාදුන්නේය.

ඇමෙරිකාවේ පැවැති සමුළුවකට සහභාගී වූ නියෝජ්‍ය අමාත්‍යවරයා සඳහන් කළේ, කොළඹ වරාය පුළුල් කිරීමේ ආයෝජන අවස්ථා ශ්‍රී ලංකා දූත පිරිස විසින් ඇමෙරිකානු ව්‍යාපාරික අංශ වෙත ඉදිරිපත් කළ බවයි. ඇමෙරිකානු ව්‍යාපාරික ප්‍රජාව ශ්‍රී ලංකාවේ උපායමාර්ගික වටිනාකම මැනවින් වටහාගෙන ඇති බවත්, වරායට යාබදව යෝජිත සැපයුම් කළමනාකරණ උද්‍යානය සංවර්ධනය සඳහා ආයෝජන අපේක්ෂා කරන බවත් ඔහු පැවසීය. වර්තමානයේ කොළඹ වරාය සතු ප්‍රධාන බහාලුම් පර්යන්ත පහක් රාජ්‍ය අයිතිය සහ රාජ්‍ය-පෞද්ගලික හවුල්කාරිත්වය යටතේ ක්‍රියාත්මක වන අතර, ඉන් නවතම පර්යන්තය වන බටහිර බහාලුම් පර්යන්තය-1 පසුගිය වසරේදී විවෘත කරන ලදී.

මේ අතර, මෑත මාසවලදී ශ්‍රී ලංකාව සහ ඇමෙරිකාව අතර සමුද්‍රීය ආරක්ෂක සහයෝගීතාව ද ඉහළ ගොස් ඇත. දකුණු සහ මධ්‍යම ආසියානු කටයුතු පිළිබඳ ඇමෙරිකානු සහකාර රාජ්‍ය ලේකම් පෝල් කපූර් කොළඹ වරායේදී නිවේදනය කළේ, ලෝකයේ කාර්යබහුලම නැව් මාර්ගවල සමුද්‍රීය සම්බන්ධතාව ශක්තිමත් කිරීම සඳහා ශ්‍රී ලංකා නාවික හමුදාවට ‘Fleet Broadband’ චන්ද්‍රිකා සන්නිවේදන තාක්ෂණය ලබාදෙන බවයි.

මීට අමතරව, සහකාර රාජ්‍ය ලේකම්වරයා සහ ඇමෙරිකානු පැසිෆික් ගුවන් බලකායේ අණදෙන නිලධාරී ජෙනරාල් කෙවින් ස්නයිඩර් විසින් ඇමෙරිකාවේ නිෂ්පාදිත TH-57 (Bell 206) හෙලිකොප්ටර් යානා 10ක් ශ්‍රී ලංකා ගුවන් හමුදාව වෙත නිල වශයෙන් පිරිනමන ලදී. මෙමඟින් ගුවන් හමුදාවේ සෙවීමේ සහ මුදාගැනීමේ මෙහෙයුම් ශක්තිමත් වන අතර නව පරපුරේ නියමුවන් පුහුණු කිරීමට ද අවස්ථාව ලැබෙනු ඇත. වර්තමාන ආරක්ෂක අභියෝගවලට මුහුණ දීම සඳහා ශ්‍රී ලංකාවට ස්වයංපෝෂිත සන්නද්ධ බලකායක් ගොඩනැඟීමට මෙය ඉවහල් වන බව කොළඹ පිහිටි ඇමෙරිකානු තානාපති කාර්යාලය සඳහන් කළේය. කලාපීය ස්ථාවරත්වය සහ ශ්‍රී ලංකාවේ ස්වෛරීභාවය වෙනුවෙන් දෙරටේ හවුල්කාරිත්වය සහ නිදහස් ඉන්දු-පැසිෆික් කලාපයක් උදෙසා ඇති කැපවීම වැදගත් වන බව ජෙනරාල් ස්නයිඩර් මෙහිදී අවධාරණය කළේය.