චීනයේ විද්‍යුත් වාහන දැවැන්තයා වන BYD, කලාපය තුළ ඔවුන්ගේ විද්‍යුත් සහ ප්ලග්-ඉන් දෙමුහුන් වාහන සඳහා ඉහළ යන ඉල්ලුම සපුරාලීමේ අරමුණින් ලබන වසරේ ජූලි හෝ අගෝස්තු වන විට පාකිස්තානයේ එකලස් කරන ලද පළමු මෝටර් රථය එළිදැක්වීමට සැලසුම් කර ඇති බව සමාගමේ විධායකයෙක් උපුටා දක්වමින් විදෙස් ජනමාධ්‍ය වාර්තා කරයි.

පාකිස්ථාන මෙහෙයුම් මධ්‍යස්ථානය නැගීඑන වෙළඳපොළවලින් ඉහළ යන ඉල්ලුම සපුරාලිය හැකි පරිදි නිෂ්පාදන සිදු කරන අතර, පාකිස්ථාන රජය විසින් පිරිනමනු ලබන දිරිගැන්වීම්වලින් ප්‍රයෝජන ගැනීමට එහිදී BYD සමාගමට අවස්ථාව උදාවේ.

එකලස් මධ්‍යස්ථානයේ ඉදිකිරීම් ඉකුත් අප්‍රේල් මාසයේදී ආරම්භ කර ඇති අතර, එම මධ්‍යස්ථානය පාකිස්තාථායේ කරච්චි නුවර පිහිටා තිබේ.

චීනයේ BYD සහ Mega Motor Company අතර සහයෝගීතාවයෙන් එම කටයුතු සිදුවෙමින් පවතින බව BYD පාකිස්ථානයේ විකුණුම් සහ උපාය මාර්ග පිළිබඳ උප සභාපති දනිස් ඛාලික් රොයිටර් පුවත් සේවය වෙත පවසා ඇත.

BYD සමාගම ඉකුත් මාර්තු මාසයේදී පාකිස්ථානය තුළ ආනයනික විදුලි වාහන බෙදාහැරීම ආරම්භ කර තිබිණි.

පාකිස්ථානය තුළ එම වාහන අලෙවිවන සංඛ්‍යාව සම්බන්ධයෙන් ඛාලික් නිශ්චිත අගයක් ප්‍රකාශයට පත්නොකළ නමුත් මෝටර් රථ සිය ගණනක අලෙවිය හමුවේ අභ්‍යන්තර ඉලක්ක 30% කින් ඉක්මවා ගොස් ඇති බව පැවසීය.

2024 දී මුළු ඒකක 1,000 ක් පමණ වූ පාකිස්ථානයේ විදුලි වාහන සහ ප්ලග්-ඉන් දෙමුහුන් මෝටර් රථවල වෙළඳපොළ ප්‍රමාණය 2025 දී තුන් හතර ගුණයකින් වර්ධනය වනු ඇතැයි තමා අපේක්ෂා කරන බව ද ඔහු පැවසීය.

ඒ අනුව BYD සමාගමේ විකුණුම් කොටසේ 30-35% ක ඉලක්ක‍යක් පවතින බව ද ඛාලික් පැවසුවේය.