පාර්ලිමේන්තු මන්ත්‍රීවරුන්ගේ මාසික වැටුප රුපියල් 60,000කින් ඉහළ නංවා ඇති බව පාර්ලිමේන්තු මන්ත්‍රී රාමනාදන් අර්චුනා පාර්ලිමේන්තුවට පැවසීය.

ඒ අනුව පාර්ලිමේන්තු මන්ත්‍රීවරයකුගේ නව වැටුප දැන් රුපියල් 484,000ක් බවයි ඔහු සඳහන් කළේය.

“තමුන්නාන්සේලාට මන්ත්‍රීවරුන්ගේ වැටුප් වැඩිකරන්න පුළුවන්, ඒත් දුප්පත් රාජ්‍ය සේවකයන්ගේ වැටුප් වැඩි කරන්න බැහැ” යැයි ඔහු ආණ්ඩු පක්ෂයේ මන්ත්‍රීවරුන්ට පැවසීය.

අදාළ අදහස් දැක්වීමේදී මන්ත්‍රීවරයා, අදාළ මාතෘකාවට පමණක් කතාකරන ලෙස ඉල්ලා සිටි ආණ්ඩු පක්ෂයේ මන්ත්‍රී උපුල් කිත්සිරි සමඟ උණුසුම් වචන හුවමාරුවක ද නිරත විය.

“අනිත් අයට ඕනෑම දෙයක් කතාකරන්න ඉඩ දෙන තමුන්නාන්සේලා මට විතරක් තහනම් කරනවා. මෙය සාධාරණ නැහැ” යැයි තම වැටුප් පත පෙන්වමින් මන්ත්‍රී අර්චුනා පැවසීය.

එම අවස්ථාවේදී මූලාසනයේ සිටි මන්ත්‍රී කිත්සිරි නිවේදනය කළේ, ස්ථාවර නියෝගවලට පටහැනිව මන්ත්‍රී අර්චුනා පවසන සියලුම කරුණු හැන්සාඩ් වාර්තාවෙන් ඉවත් කරන බවයි.

ඊට පිළිතුරු දෙමින් මන්ත්‍රී රාමනාදන් පැවසූයේ, “කවදා හරි දවසක ආණ්ඩු පක්ෂයේ සියලුම මන්ත්‍රීවරුන්ට එරෙහිව නීතිය ක්‍රියාත්මක වන බව මට පෙනෙනවා” යනුවෙනි.