ඉන්දියාව සහ ශ්‍රී ලංකාව අතර මුහුදු මාර්ගයෙන් සිදුකෙරෙන මගී ප්‍රවාහන සේවාවන් තවදුරටත් ශක්තිමත් කරමින්, තමිල්නාඩු ප්‍රාන්ත රජය විසින් නාගපට්ඨිනම් වරායේ අන්තර්ජාතික මගී පර්යන්තය වෙත තීරුබදු රහිත (Duty-Free) සිල්ලර වෙළඳ පහසුකම් හඳුන්වා දීමට සූදානම් වෙයි.

ඉන්දියාව සහ ශ්‍රී ලංකාව අතර යාත්‍රා කෙරෙන තොටුපළ සේවාවන් සඳහා පවතින ඉල්ලුම අඛණ්ඩව වර්ධනය වීමත් සමඟ, මෙම වරාය පරිශ්‍රයේ මගී අත්දැකීම අන්තර්ජාතික ගුවන් තොටුපළක හෝ ප්‍රධාන සමුද්‍රීය පර්යන්තයක පවතින ප්‍රමිතීන්ට සමාන මට්ටමකට ගෙනඒම මෙම වැඩසටහෙන් අරමුණයි.

තමිල්නාඩු සමුද්‍රීය මණ්ඩලය විසින් සංවර්ධනය කරන ලද මෙම පර්යන්තය හරහා නාගපට්ඨිනම් සහ කන්කසන්තුරය අතර මගී තොටුපළ සේවාවන් ක්‍රියාත්මක කරනු ලබයි.

2024 අගෝස්තු මාසයේදී මෙහි මෙහෙයුම් කටයුතු ආරම්භ කළ දින සිට සංචාරකයන්, වන්දනාකරුවන්, ව්‍යාපාරිකයන් මෙන්ම ඉන්දීය සහ ශ්‍රී ලාංකික ඩයස්පෝරා සාමාජිකයන් සඳහා ද මෙය වැදගත් ගමන් මාර්ගයක් බවට පත්ව ඇත.

බලධාරීන් ප්‍රකාශ කර ඇති පරිදි, දේශසීමා හරහා සිදුවන සමුද්‍රීය සම්බන්ධතාවල වර්ධනය වෙමින් පවතින ඉල්ලුම පිළිඹිබු කරමින් මේ වනවිටත් මෙම මාර්ගය ඔස්සේ මගීන් 25,000කට අධික සංඛ්‍යාවක් ගමන් කර තිබේ.

යෝජිත තීරුබදු රහිත අලෙවිසැල් මඟින්, සුදුසුකම් ලත් අන්තර්ජාතික සංචාරකයන්ට ඉන්දීය රජය විසින් නියම කර ඇති රෙගුලාසිවලට අනුකූලව, අදාළ රේගු බදු සහ බදුවලින් නිදහස් කරන ලද තෝරාගත් භාණ්ඩ මිලදී ගැනීමට අවස්ථාව හිමිවනු ඇත.

මගීන් පැමිණීමේ ප්‍රමාණය ඉහළ යාම හේතුවෙන් පර්යන්තය තුළ උසස් තත්ත්වයේ සාප්පු සවාරි අත්දැකීම් සහ අගය එකතු කළ සේවාවන් හඳුන්වාදීමට අවස්ථාව ලැබී ඇති බව නිලධාරීහු පෙන්වා දෙති.

මෙම තීරුබදු රහිත සිල්ලර වෙළඳ පහසුකම් සංවර්ධනය කිරීම සහ ක්‍රියාත්මක කිරීම බාහිරින් ලබාදීමේ ආකෘතියක් යටතේ පෞද්ගලික ක්‍රියාකරුවකු වෙත පැවරීමට නියමිතය.

මෙහි බලාත්මක කිරීමේ කටයුතු එළඹෙන ජූලි මාසයේදී ආරම්භ කිරීමට අපේක්ෂා කරන අතර, ඉදිරි මාස හය ඇතුළත මෙම වෙළඳසැල් මෙහෙයුම් කටයුතු සඳහා විවෘත කිරීමට ඉලක්ක කර ඇත.

මෙම පියවර මගින් මගීන්ගේ පහසුව තවදුරටත් ඉහළ යන අතරම ඉන්දියාව සහ ශ්‍රී ලංකාව අතර සංචාරක ව්‍යාපාරය සහ සමුද්‍රීය වෙළඳ සබඳතා තවදුරටත් දියුණු වනු ඇතැයි අපේක්ෂා කෙරේ.