රජය විසින් නියම කර ඇති උපරිම සිල්ලර මිල ඉක්මවා දේශීය කීරි සම්බා සහල් අලෙවි කිරීම හේතුවෙන් බේරුවල ප්‍රදේශයේ සුපිරි වෙළඳසැලකට කළුතර මහේස්ත්‍රාත් අධිකරණය විසින් රුපියල් මිලියනයක (ලක්ෂ 10ක) දඩයක් නියම කර තිබේ.

පාරිභෝගික කටයුතු පිළිබඳ අධිකාරිය අනාවරණය කළේ, කීරි සම්බා සහල් කිලෝග්‍රෑමයක් සඳහා ප්‍රකාශයට පත් කර ඇති රුපියල් 260ක උපරිම සිල්ලර මිල බෙහෙවින් ඉක්මවා යමින්, එම වෙළඳසැල විසින් සහල් කිලෝග්‍රෑමයක් රුපියල් 355 බැගින් අලෙවි කර ඇති බවයි.

එහිදී සිදුකළ වැටළීමකදී, නීත්‍යානුකූල මිල සීමාවට වඩා බෙහෙවින් වැඩි මිලක් වන රුපියල් 1,775 බැගින් මිල සලකුණු කර තිබූ කිලෝග්‍රෑම් 5ක සහල් ඇසුරුම් නිලධාරීන් භාරයට ගෙන ඇත.

පාරිභෝගික කටයුතු පිළිබඳ අධිකාරියේ කළුතර දිස්ත්‍රික් විමර්ශන නිලධාරීන් විසින් මේ සම්බන්ධයෙන් නීතිමය පියවර ගෙන තිබූ අතර, නඩුව විභාගයට ගත් අවස්ථාවේදී විත්තිකරුවන් පාරිභෝගික කටයුතු පිළිබඳ අධිකාරී පනත උල්ලංඝනය කිරීම සම්බන්ධයෙන් වරද පිළිගෙන තිබේ.

ඒ අනුව අධිකරණය විසින් මෙම දඩය නියම කරනු ලැබුවේ ජූලි 17 වැනිදාය.

අත්‍යවශ්‍ය භාණ්ඩ මිලදී ගැනීමේදී මුද්‍රිත උපරිම සිල්ලර මිල පිළිබඳව සැලකිලිමත් වන ලෙසත්, පාලන මිලට වඩා වැඩි මිලක් අය කරන හෝ ප්‍රමිතියෙන් තොර සහ කල් ඉකුත් වූ ආහාර ද්‍රව්‍ය අලෙවි කරන වෙළෙන්දන් පිළිබඳව පාරිභෝගික කටයුතු අධිකාරියේ 1977 ක්ෂණික ඇමතුම් අංකයට දැනුම් දෙන ලෙසත් එම අධිකාරිය පාරිභෝගිකයන්ගෙන් ඉල්ලා සිටියි.