මුදල් විශුද්ධිකරණ චෝදනාවක් යටතේ දැනට රක්ෂිත බන්ධනාගාරගත කර සිටින ‘බැකෝ සමන්’ගේ බිරිඳ වන සාධිකා ලක්ෂාණිගේ සහෝදරිය, පියා සහ පවුලේ අනෙකුත් සාමාජිකයන්ට අයත් බැංකු ගිණුම් 36ක් හරහා රුපියල් මිලියන 147කට අධික මුදලක් සංසරණය වී ඇති බව අපරාධ පරීක්ෂණ දෙපාර්තමේන්තුව වෙනුවෙන් පෙනී සිටි නියෝජ්‍ය සොලිසිටර් ජනරාල් සුහර්ෂි හේරත් කොළඹ ප්‍රධාන මහේස්ත්‍රාත් අසංග එස්. බෝදරගමට ඊයේ (23) දැනුම් දුන්නාය.

මෙම ගිණුම්වලට මුදල් තැන්පත් කළේ කවුරුන්ද සහ තැන්පත් කළේ කොහෙන්ද යන්න තීරණය කිරීම සඳහා පරීක්ෂණයක් ආරම්භ කර ඇති බවත්, පරීක්ෂණය අවසන් කිරීමට ප්‍රමාණවත් කාලයක් අවශ්‍ය බවත් ඇය අධිකරණයට පැවසුවාය.

සැකකාරියගේ සැමියා වන ‘බැකෝ සමන්’ සහ ඇගේ පියා විමර්ශන නිලධාරීන්ට ලබා දුන් ප්‍රකාශ අතර පරස්පරතා හේතුවෙන් සිද්ධිය පිළිබඳ විමර්ශනය ඉතා සංකීර්ණ වී ඇති බව නියෝජ්‍ය සොලිසිටර් ජනරාල්වරයා අධිකරණයට පෙන්වා දුන්නාය.

සිද්ධියට අදාළ විමර්ශනයේ ප්‍රගතිය පිළිබඳ වැඩිදුර වාර්තාවක් ඊයේ ඉදිරිපත් කරමින් ඇය මෙම කරුණු දැක්වීම කළාය.

“ස්වාමිනි, මෙම සැකකාරියට, ඇයගේ සහෝදරියට, පියාට සහ අනෙකුත් ඥාතීන්ට අයත් ගිණුම් 36ක් පමණ පිළිබඳ තොරතුරු අනාවරණ වී තිබෙනවා. මෙම ගිණුම් හරහා රුපියල් මිලියන 147කට වඩා සංසරණය වෙලා. මෙම ගිණුම්වල ඉතිරිව ඇති මුදලක් නැහැ, නමුත් විශාල මුදල් ප්‍රමාණයක් සංසරණය වී තිබෙනවා. මෙම මුදල් අදාළ ගිණුම්වලට බැර කළේ කවුරුන්ද සහ කුමන අරමුණක් සඳහාද යන්න විමර්ශනය කළ යුතුයි.” යනුවෙන් නඩුව තවදුරටත් පැහැදිලි කරමින් නියෝජ්‍ය සොලිසිටර් ජනරාල් සුහර්ෂි හේරත් පැවසුවාය

“මෙම සැකකාරියට එරෙහිව පවත්වනු ලබන පරීක්ෂණ සම්බන්ධයෙන්, මේ වන විට ප්‍රකාශ 13ක් පමණ සටහන් කර ගෙන තිබෙනවා. ඒ අනුව, සැකකාරිය සම්බන්ධයෙන් විමර්ශනය දෙයාකාරයකින් සිදු කෙරෙනවා. තාක්ෂණික ක්‍රම හරහා එක් පරීක්ෂණයක් පුළුල්ව කෙරෙනවා. සැකකාරිය ශ්‍රී ලංකාවෙන් පිටවීමට පෙර භාවිත කළ ජංගම දුරකථන පිළිබඳ පරීක්ෂණයක් සිදු කෙරෙනවා. විමර්ශන නිලධාරීන්ට එම නිශ්චිත දුරකථනය සොයා ගැනීමට නොහැකි වී ඇති නිසා, සැකකාරියගේ විද්‍යුත් තැපැල් ලිපිනය හරහා අදාළ දත්ත ලබා ගැනීමට පියවර ගනිමින් ඉන්නේ.” යනුවෙන් පැවසුවාය.

“මෙම සැකකාරිය, ඇයගේ සැමියා වන ‘බැකෝ සමන්’ සහ ඇයගේ පියා විසින් විමර්ශනයට ලබා දුන් ප්‍රකාශ පරස්පර විරෝධීයි. ස්වාමිනි, අපරාධ පරීක්ෂණ දෙපාර්තමේන්තුව ඉදිරියේ ඇගේ පියා සහ සැමියා විසින් ලබා දුන් ප්‍රකාශවල සඳහන් කරුණු සහ බස්නාහිර පළාත් උතුරු අපරාධ කොට්ඨාසය ඉදිරියේ ලබා දුන් ප්‍රකාශවල සඳහන් කරුණු පරස්පර විරෝධීයි. මේ නිසා, විමර්ශනය ඉතා සංකීර්ණ වී තිබෙනවා. එම නිසා විමර්ශන සඳහා ප්‍රමාණවත් කාලයක් අවශ්‍යයි.”යනුවෙන් පැවසුවාය.

“මෙම සැකකාරියට ඇප ලබා දීමට අපි විරුද්ධයි. මෙම සැකකාරිය රතු නිවේදන නිකුත් කර ඇති පුද්ගලයන් සමඟ සම්බන්ධ වී සිටියා. සැකකාරිය මත්ද්‍රව්‍ය ජාවාරමේ නිරත වූ බව පැවසීමට ඇසින් දුටු සාක්ෂිකරුවන් නැහැ. ඇය සතුව ‘කුඩු’ (හෙරොයින්) පැකට්ටුවක් තිබූ බව කියන්න කවුරුවත් නැහැ. එමනිසා , මෙම පරීක්ෂණ පැවැත්වීම සංකීර්ණ කාර්යයක්. ඒ සඳහා යම් කාලයක් අවශ්‍යයි. සැකකාරියට එරෙහිව පැහැදිලි සාක්ෂි නොමැති බවට ඇගේ නීතිඥයන් කළ ප්‍රකාශය පැමිණිල්ල ප්‍රතික්ෂේප කරනවා. මෙම කරුණු සළකා බලා, සැකකාරිය තවදුරටත් රක්ෂිත බන්ධනාගාරගත කරන ලෙස අපි අධිකරණයෙන් ඉල්ලා සිටිනවා. සිද්ධිය සම්බන්ධයෙන් සැකකාරියගෙන් ප්‍රකාශයක් ලබා ගැනීමට විමර්ශන නිලධාරීන්ට අවසර දෙන ලෙස බන්ධනාගාර නිලධාරීන්ට නියෝගයක් නිකුත් කරන ලෙසද අපි අධිකරණයෙන් ඉල්ලා සිටිනවා.” යැයි ඇය පැවසුවාය.

“ස්වාමිනි, මෙම සැකකාරියට එරෙහි චෝදනා සම්බන්ධයෙන් විමර්ශන නිලධාරීන් තවමත් අධිකරණයට නිශ්චිත ඉදිරිපත් කර නැහැ. මෙතෙක් ඉදිරිපත් කර ඇති බී-වාර්තා හරහා සැකකාරියට එරෙහි චෝදනා සම්බන්ධයෙන් පැහැදිලි සාක්ෂි ඉදිරිපත් කර නැහැ. මෙම අධිකරණයේ අධිකරණ බලයට අයත් නොවන මෙම සැකකාරිය රිමාන්ඩ් භාරයට පත් කරන ලෙස කරන ඉල්ලීම අපට අනුමත කළ නොහැකියි. එම නිසා මෙම කරුණු සළකා බලමින්, සැකකාරිය ඕනෑම සුදුසු ඇප කොන්දේසියක් මත නිදහස් කරන ලෙස මම ඉල්ලා සිටිනවා.” යනුවෙන් සැකකාරිය වෙනුවෙන් පෙනී සිටි නීතිඥ ලක්මාල් රත්නායක පැවසීය.

කරුණු සළකා බැලූ ප්‍රධාන මහේස්ත්‍රාත්වරයා සැකකාරිය ඔක්තෝබර් 31 වැනිදා දක්වා තවදුරටත් රිමාන්ඩ් භාරයට පත් කළ අතර, සිද්ධිය සම්බන්ධයෙන් විමර්ශන නිලධාරීන්ට සැකකාරියගෙන් ප්‍රකාශයක් ලබා ගැනීමට අවශ්‍ය අවසරය ලබා දෙන ලෙස බන්ධනාගාර නිලධාරීන්ට නියෝග කළේය.

ඇප ලබා දෙනවාද නැද්ද යන කාරණය ඊළඟ නඩු විභාගයේදී සළකා බලන බව මහේස්ත්‍රාත්වරයා සැකකාරිය වෙනුවෙන් පෙනී සිටි නීතිඥවරුන්ට දැනුම් දුන්නේය.