බෝතල් කළ පානීය ජල ව්‍යාපාරයක මුවාවෙන් රහසිගතව පවත්වාගෙන ගිය මහාපරිමාණ නීතිවිරෝධී මත්පැන් නිෂ්පාදනාගාරයක් කඩුවෙල ප්‍රදේශයේදී වටළා ඇති අතර, එහිදී නීතිවිරෝධී මත්පැන් බෝතල් 18,500කට අධික සංඛ්‍යාවක් සමඟ සැකකරුවන් හයදෙනකු අත්අඩංගුවට ගැනීමට පොලිසිය සමත්ව තිබේ.

බස්නාහිර පළාත් උතුර අපරාධ කොට්ඨාසයේ නිලධාරීන්ට ලැබුණු බුද්ධි තොරතුරකට අනුව, පසුගිය සෙනසුරාදා කඩුවෙල සුදර්ශන පාරේ පිහිටි දේපළක් පරීක්ෂාවට ලක්කරමින් මෙම වැටළීම සිදුකර ඇත. එහිදී පානීය ජල ව්‍යාපාරයක් ලෙස පෙනීසිටිමින්, එම පරිශ්‍රය තුළ හොර රහසේ නීතිවිරෝධී මත්පැන් නිෂ්පාදනය කර ඇති බව පොලිසිය අනාවරණය කරගෙන තිබේ.

මෙම මෙහෙයුමේදී දේශීයව නිෂ්පාදිත මත්පැන් අඩංගු මිලිලීටර් 180 බෝතල් 18,575ක් (මත්පැන් ලීටර් 3,345.5ක්) සහ විදේශීය මත්පැන් ලෙස ලේබල් කරන ලද ලීටර් එකේ බෝතල් හතරක් මෙන්ම මිලිලීටර් 750ක බෝතලයක් ද පොලිස් භාරයට ගෙන ඇත.

මීට අමතරව, මත්පැන් නිෂ්පාදන ක්‍රියාවලිය සඳහා යොදාගත් බවට සැකකෙරෙන එතනෝල් බෝතලයක්, මත්පැන් නිෂ්පාදනයට ගන්නා විවිධ උපකරණ රැසක් සහ කේරළ ගංජා ග්‍රෑම් 50යි මිලිග්‍රෑම් 200ක ප්‍රමාණයක් ද එහි තිබී සොයාගෙන තිබේ.

අත්අඩංගුවට ගත් සැකකරුවන් හයදෙනා වයස අවුරුදු 30, 43, 58, 59 සහ 62 යන වයස්වල පසුවන්නන් වන අතර, ඔවුන් මිහින්තලේ, මරදාන, වත්තල, වේබඩ දකුණ, ගැටලාව සහ සිප්පිකුලම යන ප්‍රදේශවල පදිංචිකරුවෝ වෙති.

මෙම නීතිවිරෝධී මත්පැන් ජාවාරම ඉතා සංවිධානාත්මකව වාණිජ මට්ටමින් පවත්වාගෙන ගොස් ඇති බවට පොලිසිය සැකකරන අතර, නීත්‍යානුකූල ජල ව්‍යාපාරයේ මුවාවෙන් මෙම මත්පැන් විවිධ ප්‍රදේශවලට බෙදාහැර තිබේද යන්න පිළිබඳව ද විමර්ශන ආරම්භ කර ඇත.

සිද්ධිය සම්බන්ධයෙන් බස්නාහිර පළාත් උතුර අපරාධ කොට්ඨාසය වැඩිදුර පරීක්ෂණ පවත්වයි.