ශ්‍රී ලංකා විදේශ සේවයට අලුතින් බඳවා ගත් නිලධාරීන් 20 දෙනෙක් ඊයේ(11) වැඩ භාරගෙන තිබේ.

ඒ, එම පිරිස විදේශ ලේකම් අරුණි විජේවර්ධන විසින් අමාත්‍යාංශය වෙත පිළිගැනීමෙන් අනතුරුවය.

විදේශ කටයුතු අමාත්‍යාංශයට අනුව, විදේශ ලේකම්වරයා ශ්‍රී ලංකා විදේශ සේවයේ වැදගත් කාර්යභාරය සහ රජයේ සේවකයන් ලෙස සියලුම නිලධාරීන්ගේ විශේෂ වගකීම් පැහැදිලි කර ඇත.

ආර්ථික රාජ්‍ය තාන්ත්‍රිකත්වයට ප්‍රමුඛත්වය ලබා දීම ඇතුළු නවීන රාජ්‍ය තාන්ත්‍රික ලෝකයේ අවශ්‍ය කුසලතා පිළිබඳව ද ඇය සඳහන් කර තිබිණි.

රාජ්‍ය සේවා කොමිෂන් සභාව මගින් විවෘත තරග විභාග හා සම්මුඛ පරීක්ෂණ ක්‍රියාවලියක් මගින් නව නිලධාරීන් 20 දෙනෙකු විදේශ කටයුතු අමාත්‍යාංශයට බඳවාගෙන ඇති බව අමාත්‍යාංශය වැඩිදුරටත් සඳහන් කළේය.

අලුතින් බඳවා ගන්නා ලද නිලධාරීන් විදේශ කටයුතු අමාත්‍යාංශයේ වැඩ භාර ගැනීමට පෙර බණ්ඩාරනායක අන්තර්ජාතික රාජ්‍යතාන්ත්‍රික පුහුණු ආයතනය විසින් පවත්වනු ලබන බඳවා ගැනීමේ පුහුණු වැඩසටහනට ද සහභාගී වනු ඇත.