කපිල චන්ද්‍රසේනගේ මරණයට අදාළ මහේස්ත්‍රාත් පරීක්ෂණයේ 19 වැනි සහ 20 වැනි සාක්ෂිකරුවන් වන ජනාධිපති නීතිඥ රියෙන්සි අර්සකුලරත්න සහ ඔහුගේ කනිෂ්ඨ නීතිඥ උදාර මුහන්දිරම්ගේ සාක්ෂි දීම අවශ්‍ය ද නැද්ද යන්න පිළිබඳ තීන්දුව ලබන ජූනි මස 2 වැනිදා ප්‍රකාශයට පත් කරන ලෙස කොටුව මහේස්ත්‍රාත් පසන් අමරසේන අද නියෝග කළේය.

කපිල චන්ද්‍රසේනගේ මරණය සම්බන්ධයෙන් වන මහේස්ත්‍රාත් පරීක්ෂණය අද (29) කොටුව මහේස්ත්‍රාත් පසන් අමරසේන ඉදිරියේදී කැඳවනු ලැබීය.

එහිදී, මියගිය කපිල චන්ද්‍රසේන වෙත නීති උපදෙස් ලබා දී තිබූ ජනාධිපති නීතිඥ රියෙන්සි අර්සකුලරත්න සහ ඔහුගේ කනිෂ්ඨ නීතිඥ උදාර මුහන්දිරම්ගේ කොළඹ අපරාධ කොට්ඨාසය (CCD) මඟින් නිකුත් කරන ලද නිවේදනයකට අනුව මහේස්ත්‍රාත් පරීක්ෂණය සඳහා සාක්ෂි දීමට අද අධිකරණයේ පෙනී සිටියහ.

එම අවස්ථාවේදී, ජනාධිපති නීතිඥ රියෙන්සි අර්සකුලරත්න සහ නීතිඥ උදාර මුහන්දිරම්ගේ යන දෙදෙනාගේ හිමිකම් සහ අයිතිවාසිකම් වෙනුවෙන් ශ්‍රී ලංකා නීතිඥ සංගමයේ සභාපති රජීව් අමරසූරිය ඇතුළු නීතිඥවරුන් පිරිසක් අධිකරණයේ පෙනී සිටියහ.

ශ්‍රී ලංකා නීතිඥ සංගමයේ සභාපති රජීව් අමරසූරිය එහිදී අධිකරණයට පෙන්වා දුන්නේ, මෙම මහේස්ත්‍රාත් පරීක්ෂණයේදී සාක්ෂි දීම සඳහා 19 වැනි සහ 20 වැනි සාක්ෂිකරුවන් වන ජනාධිපති නීතිඥ රියෙන්සි අර්සකුලරත්න සහ ඔහුගේ කනිෂ්ඨ නීතිඥ උදාර මුහන්දිරම්ගේ අධිකරණය හමුවට කැඳවීම අත්‍යවශ්‍ය ද යන්න පිළිබඳ මහේස්ත්‍රාත්වරයාට සලකා බලා තීරණයක් ගත හැකි බවයි.