මියගිය සහ ආබාධිත රණවිරුවන්ගේ මව්පියන්ට ලබා දෙන ‘මා පිය රැකවරණ’ සුභසාධන දීමනාව අත්හිටුවා ඇති බවට පැතිර යන ප්‍රකාශ ආරක්ෂක අමාත්‍යාංශය තරයේ ප්‍රතික්ෂේප කරයි.

ආරක්ෂක අමාත්‍යාංශය පවසන්නේ එවැනි වාර්තා සම්පූර්ණයෙන්ම අසත්‍ය සහ නොමඟ යවන සුළු වාර්තා බවයි.

පාර්ලිමේන්තුව අමතමින් නියෝජ්‍ය ආරක්ෂක අමාත්‍ය විශ්‍රාමික මේජර් ජෙනරාල් අරුණ ජයසේකර ඊයේ (24) පැවසුවේ රණවිරු සෙවණ අධිකාරියේ අධීක්ෂණය යටතේ අදාළ දීමනාව බාධාවකින් තොරව අඛණ්ඩව ලබාදෙන බවයි.

රජය එම මූල්‍ය ආධාර යෝජනා ක්‍රමය අත්හිටුවීමට කිසිදු තීරණයක් ගෙන නොමැති බව ඔහු අවධාරණය කළේය.

සුදුසුකම් ලත් මව්පියන්ගෙන් එක් අයකුට රුපියල් 750ක මාසික දීමනාවක් ලැබෙන අතර එය හිමිවන මව්පියන් ජීවතුන් අතර සිටින බව තහවුරු කිරීම සඳහා වසරකට දෙවරක් ජීවිත සහතිකය ඉදිරිපත් කිරීමට ප්‍රතිලාභීන් අපොහොසත් වන අවස්ථාවන්හිදී ගෙවීම් ප්‍රමාද විය හැකි බව ඔහු පැවසීය.

සුදුසුකම් ලත් ප්‍රතිලාභීන් 32,867 දෙනෙකුගෙන්, වසරේ පළමු භාගය සඳහා මව්පියන් 17,636 දෙනෙකු විසින් ජීවිත සහතික ඉදිරිපත් කර ඇති අතර, ජූලි මාසයේ සිට ආරම්භ වන වසරේ දෙවැනි භාගය සඳහා මේ දක්වා ලැබී ඇත්තේ සහතික 4,727ක් පමණක් බව මෙහිදී හෙළි කෙරිණි.

ඉතිරි ප්‍රතිලාභීන්ගෙන් එවැනි සහතිකයක් නොලැබීම නිසා ගෙවීම් සැකසීමට නොහැකි වී ඇති බව අමාත්‍යාංශය පැහැදිලි කළේය.