ඇමරිකානු ජනාධිපති ඩොනල්ඩ් ට්‍රම්ප්ගේ චීන සංචාරය සඳහා එක්ව සිටි අමෙරිකානු දූත පිරිස විසින් චීනයෙන් හිමි වූ ත්‍යාග කසල බඳුනකට දමා විනාශ කිරීම, වොෂින්ටනය සහ බීජිං අතර පවතින දැඩි අවිශ්වාසය පිළිබිඹු කරන දැඩි ආරක්ෂක සහ ප්‍රොටෝකෝල පියවරක් බව විදෙස් ජනමාධ්‍ය වාර්තා කරයි.

මෙම හැසිරීම හුදෙක් (චේතනාන්විත දේශපාලනික අවඥාවක්) පමණක් නොවන අතර, සුපිරි බලවතුන් දෙදෙනා අතර දිනෙන් දින උග්‍ර වන ගැටුම්කාරී වටපිටාව තුළ පැහැදිලි උපායමාර්ගික ඇඟවුම් ද දරයි.

ඇමරිකානු ආරක්ෂක පියවරයන්ට අනුව ට්‍රම්ප් සමඟ පැමිණි ජ්‍යෙෂ්ඨ නිලධාරීන් සහ ව්‍යාපාරිකයන් ඇතුළු ජනාධිපති දූත පිරිසේ සාමාජිකයින්ට චීනයෙන් නිෂ්පාදිත (තෑගි, ලාංඡන, පින් සහ සමරු සිහිවටන) වැනි කිසිදු භාණ්ඩයක් එයාර් ෆෝස් වන් නිල ගුවන් යානය තුළට රැගෙන ඒම තහනම් කරමින් දැඩි උපදෙස් ලබා දී තිබුණි.

ඇමරිකාවේ පවතින බොහෝ ආරක්ෂක ගැටලු සැලකිල්ලට ගනිමින්, මෙම භාණ්ඩ ගුවන් යානයේ පියගැටපෙළ පාමුල ඇති බඳුන්වලට දමා විනාශ කිරීමට නියමිතව තිබුණි.

චීනය විසින් සිදු කළ හැකි සයිබර් ඔත්තු බැලීම් වැළැක්වීම සඳහා, සංචාරය පුරාවට භාවිතා කරන ලද තාවකාලික දුරකථන විනාශ කිරීම ද මෙම ආරක්ෂක පියවරයන්ට ඇතුළත් විය. එහිදී ඇමරිකානු ජනාධිපති දූත පිරිස විශ්වාසය තබා තිබුණේ කිසිදු ඩිජිටල් සලකුණක් ඉතිරි නොකරන උපාංග කෙරෙහිය.