ආරක්ෂිත සත්ව සහ සමුද්‍රීය කොටස් සන්තකයේ තබාගෙන ඒවා විකිණීමට උත්සාහ කිරීමේ වරදට වාරියපොළ සහ මිනුවන්ගැටේ ප්‍රදේශවල පදිංචි පුද්ගලයන් දෙදෙනෙකුට වාරියපොළ මහේස්ත්‍රාත් අධිකරණය විසින් එක් අයෙකුට රුපියල් 450,000 බැගින් දඩ නියම කර ඇත.

ඔවුන් සන්තකයේ තිබී සොයාගත් භාණ්ඩ අතර ශ්‍රී ලංකා නීතිය යටතේ ආරක්ෂිත අයිතම ලෙස සැලකෙන අලි දතක්, කොටින්ගේ දතක් සහ කළු කොරල්පර කැබැල්ලක් තිබී ඇත.

කුරුණෑගල වනජීවී කාර්යාලයේ සහ රිටිගල වනජීවී රක්ෂිතයේ නිලධාරීන් කණ්ඩායමක් විසින් මැයි 4 වැනිදා වාරියපොළ පොලිස් බලප්‍රදේශයට අයත් මිනුවන්ගැටේ, 20 හන්දිය ප්‍රදේශයේදී මෙම සැකකරුවන් දෙදෙනා අත්අඩංගුවට ගෙන තිබිණි.

ආරක්ෂිත සත්ව කොටස් සන්තකයේ තබාගැනීම, ප්‍රදර්ශනය කිරීම සහ විකිණීමට තැත් කිරීම යන චෝදනාවලට සැකකරුවන් අධිකරණය හමුවේ වරදකරුවන් වූ අතර, ඒ අනුව අධිකරණය විසින් මෙලෙස එක් අයෙකුට රුපියල් 450,000 බැගින් දඩ මුදල් නියම කරන ලදී.