එක්සත් ජනපද හමුදා පහසුකම් සඳහා සත්කාරකත්වය සපයන ගල්ෆ් ජාතීන්ට ඉරාන ප්‍රතිප්‍රහාර එල්ල කිරීම දෙවැනි සතියට එළඹෙත්ම සෞදි අරාබියේ අල්-ඛාර්ජ් නගරයේ නේවාසික ස්ථානයකට මිසයිලයක් පතිත වීමෙන් අවම වශයෙන් පුද්ගලයන් දෙදෙනෙකු මිය ගොස් ඇති බව සෞදි බලධාරීන් සඳහන් කර තිබේ.

ඉරානය ගැන සඳහන් නොකර X හි පළ කළ සටහනක සෞදි සිවිල් ආරක්ෂක අංශය ඊයේ පැවසුවේ නිශ්චිත නොවන මිලිටරි ප්‍රක්ෂේපණයක් අල්-ඛාර්ජ් හි නේවාසික ප්‍රදේශයකට පහර දී ඇති බවත්, එහි ප්‍රතිඵලයක් ලෙස ඉන්දියානුවකු සහ බංග්ලාදේශ ජාතිකයකු මිය ගොස් තවත් 12 දෙනෙකු තුවාල ලබා ඇති බවත්ය.

ඉරානයේ ඉස්ලාමීය විප්ලවවාදී ආරක්ෂක බලකාය මීට පෙර පවසා තිබුණේ එක්සත් ජනපද හමුදා විසින් භාවිත කරන ලද ප්‍රින්ස් සුල්තාන් ගුවන් කඳවුර පිහිටා ඇති අල්-ඛාර්ජ් ආණ්ඩුකාර කාර්යාලය ඇතුළු ස්ථානවල රේඩාර් පද්ධති ඉලක්ක කරගත් අතර පසුගිය සතිය තුළ ඉරානයට එරෙහි එක්සත් ජනපද සහ ඊශ්‍රායල යුද්ධයේදී නැවත නැවතත් ප්‍රහාරවලට ලක්ව ඇති බවයි.

අල් ජසීරා වාර්තාවක දැක්වුණේ මිසයිලය නඩත්තු සහ පිරිසිදු කිරීමේ සමාගමකට අයත් නේවාසික ස්ථානයකට පතිත වී ඇති බවයි.

“ගල්ෆ් රටවල් හරහා ජාතීන් 200කට අධික සංඛ්‍යාවක් ජීවත් වන අතර ඔවුන් සේවය කරන බව අවධාරණය කිරීම ඇත්තෙන්ම වැදගත්. මේවායින් බොහෝ දෙනෙක් කම්කරුවන් විය හැකියි” යනුවෙන් වාර්තාව ඉදිරිපත් කළ වාර්තාකාරිණිය පැවසුවාය.

ඉරිදා, සෞදි ආරක්ෂක අමාත්‍යාංශය ඩ්‍රෝන යානා 15ක් අල්ලා ගත් බව වාර්තා කළ අතර, රියාද් අගනුවර රාජ්‍ය තාන්ත්‍රික නිවස්නයකට ප්‍රහාරයක් එල්ල කිරීමට උත්සාහ කිරීම ද ඊට ඇතුළත් විය.

මේ අතර, කුවේට්, අන්තර්ජාතික ගුවන්තොටුපළේ ඉන්ධන ටැංකිවලට ප්‍රහාරයක් එල්ල වූ බව පැවසෙන අතර, බහරේනය වාර්තා කළේ ජල ලවණ ඉවත් කිරීමේ කම්හලකට හානි සිදු වූ බවය.

විධායක නිලධාරියෙකුට අනුව, ඉරාන අගනුවර වටා ඇති තෙල් පහසුකම් පහකට ඊශ්‍රායල යුධ ගුවන් යානා පහර දී කිහිප දෙනෙකු මිය ගොස් නගරය දැඩි දුමාරයකින් වැසී යෑමෙන් පසුව ඉරිදා මෙම ප්‍රහාර එල්ල වී තිබේ.

යුද්ධය නවවැනි දිනය දක්වා දීර්ඝ වූ විට, මැද පෙරදිග පුරා ඩ්‍රෝන සහ මිසයිල ප්‍රහාර මාස හයක් දක්වා අඛණ්ඩව සිදුකිරීමට ප්‍රමාණවත් සැපයුම් තමන් සතුව ඇති බව ඉරානයේ ඉස්ලාමීය විප්ලවවාදී ආරක්ෂක බලකාය පැවසීය.

අරාබි ලීගයේ මහලේකම් අහමඩ් අබූල් ගයිට් පැවසුවේ, සාමාජික රටවල් කිහිපයකට ඉරානය එල්ල කළ ප්‍රහාර නොසැළකිලිමත් බවත්, එම දැවැන්ත උපායමාර්ගික වැරැද්ද ආපසු හැරවීමට ටෙහෙරානයට බල කළ බවත්ය.

ඉරාන සෞඛ්‍ය අමාත්‍යාංශය ඉරිදා පැවසුවේ පෙබරවාරි 28 වැනිදා එක්සත් ජනපදය සහ ඊශ්‍රායලය ඉරානයට එරෙහිව යුද්ධයක් දියත් කළ දා සිට අවම වශයෙන් සිවිල් වැසියන් 1,200ක් මිය ගොස් 10,000ක් පමණ තුවාල ලබා ඇති බවයි.