අනුරාධපුර රුවන්වැලි මහා සෑය අසලදී ඊයේ මාරාන්තික උපවාසයක නිරත වීමෙන් අනතුරුව අත්අඩංගුවට ගනු ලැබූ පූජ්‍ය බලංගොඩ කස්සප භික්ෂුව රෝහල්ගතව සිටියදී පොලිස් නිලධාරීන්ට බැන වැදී තර්ජනය කරන අයුරු දැක්වෙන වීඩියෝ දර්ශන සමාජ මාධ්‍ය ඔස්සේ සංසරණය වෙමින් පවතී.

අදාළ වීඩියෝ දර්ශනවල දැක්වෙන ආකාරයට, රෝහල් ඇඳක සිටින එම භික්ෂුව අසල වෛද්‍ය කාර්ය මණ්ඩලය සහ පොලිස් නිලධාරීන්ගෙන් වට වී සිටින අතර, තමන් සමඟ පසුවන පොලිස් නිලධාරීන්ට එම භික්ෂුව වාචිකව දෝෂාරෝපණය කරමින් තර්ජන කරනු දක්නට ලැබේ.

අනුරාධපුර රුවන්වැලිසෑය අසල මාරාන්තික උපවාසයක නිරත වූ පූජ්‍ය බලංගොඩ භික්ෂුව ඇතුළු බෞද්ධ භික්ෂූන් වහන්සේලා තිදෙනෙක් ඊයේ එම ස්ථානයේ ඇති වූ උණුසුම්කාරී තත්ත්වයක් හේතුවෙන් පොලිස් භාරයට ගනු ලැබුවේය.

එම විරෝධතා භූමියේදී කස්සප භික්ෂුව සහ තවත් පිරිසක්, පූජ්‍ය රාජාංගනයේ සද්ධාරතන හිමි සහ තවත් ගිහි පිරිසක් සමඟ හටගත් බහින්බස්වීමකින් අනතුරුව මෙම අත්අඩංගුවට ගැනීම සිදුව තිබේ.

මේ අතර, අනුරාධපුර පූජා භූමියේදී පැවති මෙම විරෝධතාවට සම්බන්ධ වූ බලංගොඩ කස්සප භික්ෂුව ඇතුළු හත්දෙනෙකු ලබන නොවැම්බර් 26 වැනි දින දක්වා රක්ෂිත බන්ධනාගාරගත කිරීමට අනුරාධපුර මහේස්ත්‍රාත් අධිකරණය නියෝග කර ඇත.

පූජා භූමියේ විරෝධතාව දිගටම පවත්වාගෙන යමින් සැකකරුවන් මීට පෙර ලබා දී තිබූ අධිකරණ නියෝග උල්ලංඝනය කර ඇති බවට එල්ල වී ඇති චෝදනා මත මෙම නියෝගය නිකුත් කර තිබේ.