ඉරානයේ ඊළඟ උත්තරීතර නායකයා කෙරෙහි ද බලපෑම් කරන බව එක්සත් ජනපද ජනාධිපති ඩොනල්ඩ් ට්‍රම්ප් නැවතත් ප්‍රකාශ කර තිබේ.

වොෂින්ටනයේ අනුමැතියකින් තොරව එම තනතුර සඳහා තෝරා ගන්නා ඕනෑම අයකු ‘දිගු කලක් නොවතිනු ඇත’ යනුවෙන් ද ඔහු සඳහන් කර ඇත.

පෙබරවාරි 28 වැනිදා එක්සත් ජනපදය සහ ඊශ්‍රායලය ඉරානයට එරෙහිව යුද්ධයක් දියත් කිරීමෙන් පසු පැය කිහිපය තුළ මිය ගිය අයතුල්ලා අලි කමේනිගේ පුත් මොජ්තාබා කමේනි, විශේෂඥයන්ගේ සභාව විසින් නව උත්තරීතර නායකයා ලෙස තෝරාගෙන ඇති බව ඉරාන රාජ්‍ය මාධ්‍ය වාර්තා කිරීමට පැය කිහිපයකට පෙර ඉරිදා ට්‍රම්ප්ගේ ප්‍රකාශය නිකුත් විය.

බාල කමේනි තෝරා පත්කර ගැනීම සම්බන්ධයෙන් ට්‍රම්ප් වහාම ප්‍රතිචාර නොදැක්වූ නමුත්, ඕනෑම පුද්ගලයකුට එක්සත් ජනපද අනුමැතිය අවශ්‍ය බව කලින් දැඩිව පවසා තිබිණි.

ට්‍රම්ප් පරිපාලනය තීරණයට කිසිදු බලපෑමක් කර නොමැති බව ඉරාන නිලධාරීන් අවධාරණය කර ඇත.

“ඔහුට අපෙන් අනුමැතිය ලබා ගැනීමට සිදුවෙයි. ඔහු අපෙන් අනුමැතිය ලබා නොගන්නේ නම්, ඔහු වැඩි කල් පවතින්නේ නැහැ,” ට්‍රම්ප් නව උත්තරීතර නායකයකු ගැන සඳහන් කරමින් ABC ප්‍රවෘත්ති වෙත පැවසීය.

මැද පෙරදිග පුරා පළිගැනීමේ ප්‍රහාර දියත් කර ඇති ඉරානයේ නිලධාරීන්, නව නායකයා තෝරාගැනීම කෙරෙහි වොෂින්ටනයේ බලපෑමක් ඇති බවට වන අදහස නැවත නැවතත් ප්‍රතික්ෂේප කර ඇත.

ඉරාන විදේශ කටයුතු අමාත්‍ය අබ්බාස් අරග්චි නැවතත් පැවසුවේ “අපගේ දේශීය කටයුතුවලට ඇඟිලි ගැසීමට අපි කිසිවෙකුට ඉඩ දෙන්නේ නැහැ” යනුවෙනි.

“නව නායකයා තෝරා ගැනීම ඉරාන ජනතාවට භාරයි,” ඔහු පැවසුවේය.

ඉරාන ජාතිකයන් උත්තරීතර නායකයා තෝරා ගන්නා ආයතනය වන විශේෂඥයන්ගේ සභාව එම තෝරා පත් කර ගැනීම සිදුකරන බව ඔහු සඳහන් කර තිබිණි.

යුද්ධය ආරම්භ වූ දා සිට හත්වැන්නා ලෙස එක්සත් ජනපද සොල්දාදුවකු මිය ගොස් ඇති බව පෙන්ටගනය තහවුරු කිරීමෙන් ටික කලකට පසු මොජ්ටාබා කමේනිගේ තේරීම නිවේදනය කරන ලදී.

නිවේදනයක් නිකුත් කරමින් එක්සත් ජනපද මධ්‍යම අණදෙන නිලධාරියා පැවසුවේ හඳුනානොගත් සොල්දාදුවා මාර්තු 1 වැනිදා සෞදි අරාබි රාජධානියේ එක්සත් ජනපද හමුදා වෙත ප්‍රහාරයක් එල්ල වූ ස්ථානයේ දී තුවාල ලබා සෙනසුරාදා මිය ගිය බවයි.

මේ අතර, ඉරානයේ මරණ සංඛ්‍යාව 1,332 දක්වා ඉහළ ගොස් ඇති අතර, ගල්ෆ් කලාපය පුරා අවම වශයෙන් පුද්ගලයන් 11 දෙනෙකු මිය ගොස් තිබේ.