චීන මහජන සමූහාණ්ඩු රජය විසින් කරන ලද ආරාධනයකට අනුව, 2025 කාන්තාවන් පිළිබඳ ගෝලීය නායකයන්ගේ රැස්වීමට සහභාගී වීම සඳහා අගමැතිනි ආචාර්ය හරිනි අමරසූරිය අද චීනය බලා පිටත්ව ගියාය.

‘එක් බෙදාගත් අනාගතයක්: කාන්තාවන්ගේ සර්ව සම්පූර්ණ සංවර්ධනය සඳහා නව සහ වේගවත් ක්‍රියාවලිය’ යන තේමාව යටතේ බීජිං හි පැවැත්වෙන මෙම ඉහළ මට්ටමේ සමුළුව චීන රජය සහ ‘එක්සත් ජාතීන්ගේ කාන්තාවන්’ එක්ව සංවිධානය කරයි.

සිය සංචාරය අතරතුර, අගමැතිනි අමරසූරිය ස්ත්‍රී පුරුෂ සමානාත්මතාව, කාන්තා බලගැන්වීම ඇතුළු ප්‍රතිපත්ති ප්‍රතිසංස්කරණවල ශ්‍රී ලංකාවේ ප්‍රගතිය ඉස්මතු කරමින් ප්‍රධාන දේශනයක් පැවැත්වීමට නියමිතය.

අගමැතිනිය දෙරට අතර සමාජ සංවර්ධනය, අධ්‍යාපනය සහ කාන්තාවන් විසින් මෙහෙයවනු ලබන ව්‍යවසායකත්වයේ සහයෝගීතාව ශක්තිමත් කිරීම කෙරෙහි අවධානය යොමු කරමින් චීන ජනාධිපති ෂී ජින් පිං සහ අගමැති ලී කියැං සමඟ ද්විපාර්ශ්වික සාකච්ඡා පැවැත්වීමට ද අපේක්ෂා කෙරේ.

කාන්තා, ළමා කටයුතු සහ සමාජ සවිබල ගැන්වීමේ අමාත්‍යාංශයේ ජ්‍යෙෂ්ඨ නිලධාරීන් මෙන්ම අගමැති කාර්යාලයේ නියෝජිතයන් ද අග්‍රාමාත්‍යවරිය සමඟ පිටත්ව ගොස් ඇත.