බ්‍රිතාන්‍ය ජාතික ප්‍රකට හාස්‍යෝත්පාදක නළුවෙකු වන රසල් බ්‍රෑන්ඩ් ස්ත්‍රී දූෂණය සහ ලිංගික අතවර කිරීම් සම්බන්ධයෙන් වරදකරු බව ලන්ඩන් අධිකරණයක් විසින් තීන්දු කර තිබේ. ඒ අනුව ඔහුට දීර්ඝ කාලීන සිරදඬුවමක් හිමිවීමට නියමිත බව අධිකරණය ප්‍රකාශ කළේය.

එක්සත් රාජධානියේ ජනප්‍රියතම මාධ්‍යවේදියෙකු මෙන්ම ඇමෙරිකානු ගායිකා කේටි පෙරීගේ හිටපු සැමියා ද වන රසල් බ්‍රෑන්ඩ් තමාට එල්ල වූ චෝදනා ප්‍රතික්ෂේප කර තිබුණි. මෙම සිදුවීම් දෙපාර්ශ්වයේම කැමැත්තෙන් සිදු වූ ඒවා බවත්, නැතහොත් ගොතන ලද හෝ මනඃකල්පිත සිදුවීම් බවත් ඔහු පවසා තිබිණි.

“Get Him to the Greek” සහ “Arthur” යන චිත්‍රපටවල ප්‍රධාන චරිත රඟපෑ 51 හැවිරිදි බ්‍රෑන්ඩ්, නිර්දය ලෙස කාන්තාවන් ගොදුරු කරගත් ලිංගික විලෝපිකයෙකු ලෙස පැමිණිල්ල මෙහෙයවූ නීතිඥයන් අධිකරණය හමුවේ හඳුන්වා දෙන ලදී.

ලන්ඩන් හි සවුත්වාර්ක් ක්‍රවුන් අධිකරණයේ විභාග වූ මෙම නඩුවේදී, ඔහු ස්ත්‍රී දූෂණ චෝදනා එකකට සහ ලිංගික අතවර කිරීම් චෝදනා තුනකට වරදකරු විය. කෙසේ වෙතත්, තවත් ස්ත්‍රී දූෂණ චෝදනා දෙකකින් සහ අශෝභන ලෙස අතවර කිරීමට තැත් කිරීමේ චෝදනාවකින් ඔහු නිදහස් කරනු ලැබීය.

නඩුව විභාග කළ ජොයෙල් බෙනතන් විනිසුරුවරයා සඳහන් කළේ ලබන සඳුදා දින ඔහුට දඬුවම් නියම කරන බවත්, ඔහුට දීර්ඝ කාලීන සිරදඬුවමකට මුහුණ දීමට සිදුවනු ඇති බවත්ය. පස්වරු 03 ට පෙර ඇප ඉල්ලුම්පතක් ඉදිරිපත් කිරීමට නියමිතව තිබියදී බ්‍රෑන්ඩ් අධිකරණ බන්ධනාගාර මැදිරිය වෙත රැගෙන යන ලදී.

1999 සහ 2009 අතර කාලය තුළ සිදුවූ බව කියන මෙම සිදුවීම්, බ්‍රෑන්ඩ් කුඩා ස්ථානවල ස්ටෑන්ඩ්-අප් කොමඩි ඉදිරිපත් කිරීමේ සිට රූපවාහිනී නිවේදකයෙකු සහ හොලිවුඩ් සිනමා තරුවක් බවට පත්වූ කාල පරිච්ඡේදය දක්වා දිවෙන බව පැමිණිල්ල පැවසීය.

ජීවිතාන්තය දක්වාම රහස්‍යභාවය සුරැකීමේ අයිතිය හිමි මෙම පැමිණිලිකාර කාන්තාවන් හයදෙනා අධිකරණය හමුවේ සිය කඳුළු පිරි, ප්‍රබල සාක්ෂි ලබා දුන්හ. මෙම කාන්තාවන් කිසිවෙකුත් එකිනෙකා හඳුනාගෙන නොසිටි නමුත්, 2023 වසරේදී අනෙකුත් කාන්තාවන් කළ නිර්නාමික චෝදනා අඩංගු රූපවාහිනී වාර්තා චිත්‍රපටයක් සහ පුවත්පත් වාර්තා පළවීමෙන් පසුව සියලු දෙනාම පොලිසිය හමුවට පැමිණ තිබුණි.