ජනාධිපති අනුර කුමාර දිසානායක සැප්තැම්බර් මාසයේදී විදේශ සංචාර දෙකක් සිදු කිරීමට නියමිත බව වාර්තා වේ.

ඉන් එකක් නිව්යෝර්ක් හි පැවැත්වෙන එක්සත් ජාතීන්ගේ මහා මණ්ඩල සැසිවාරයට සහභාගී වීම සඳහා වන අතර ඉන්පසුව ජනාධිපතිවරයා ජපානයේ රාජ්‍ය සංචාරයක නිරතවීමට නියමිතය.

ජනාධිපතිවරයා සැප්තැම්බර් 23 වැනිදා අමෙරිකා එක්සත් ජනපදය බලා පිටත්ව යන අතර 24 වැනිදා එක්සත් ජාතීන්ගේ මහා මණ්ඩල සැසිවාරය ඇමතීමට නියමිත බව විදේශ අමාත්‍ය විජිත හේරත් පැවසීය.

එක්සත් ජාතීන්ගේ මහා මණ්ඩල සැසිවාරය අමතමින් ජනාධිපතිවරයා විදේශ ප්‍රතිපත්තිය ඇතුළු තම රජයේ ප්‍රතිපත්ති ගෙනහැර දක්වනු ඇත.

ජනාධිපතිවරයා මහා මණ්ඩල සැසිවාරයට සමගාමීව තවත් ලෝක නායකයන් කිහිප දෙනෙකු ද හමුවනු ඇති බව අමාත්‍ය හේරත් පැවසීය.

නිව්යෝර්ක් සිට ජනාධිපතිවරයා සැප්තැම්බර් 27 වැනිදා ජපානයේ ඔසාකා වෙත යන අතර එහිදී ඔහු එක්ස්පෝ 2025 සඳහා සහභාගී වනු ඇත.

සංස්කෘතිය, සංචාරක ව්‍යාපාරය, වෙළඳාම සහ ආයෝජන ක්ෂේත්‍රයේ අද්විතීය අවස්ථා ප්‍රදර්ශනය කෙරෙන එක්ස්පෝ හි ශ්‍රී ලංකා දිනයට ඔහු සහභාගී වනු ඇත.

මෙයින් පසු සැප්තැම්බර් 28 වන දින ජපාන අගමැති ෂිගේරු ඉෂිබාගේ ආරාධනයෙන් ජපානයේ රාජ්‍ය සංචාරයක් ආරම්භ වේ.

ජනාධිපති දිසානායක සැප්තැම්බර් 29 වන දින අගමැති ඉෂිබා සමඟ සාකච්ඡා පවත්වන අතර 30 වන දින ජපාන අධිරාජ්‍යයා වන නරුහිතෝ මහතා හමුවනු ඇත.

ටෝකියෝවේ පැවැත්වෙන සාකච්ඡාවලදී ජපානයේ ශ්‍රී ලාංකිකයන්ට වැඩි රැකියා අවස්ථා ලබා ගැනීම සහ ආර්ථික සබඳතා වැඩි දියුණු කිරීම කෙරෙහි අවධානය යොමු කෙරෙනු ඇතැයි අමාත්‍ය හේරත්පැවසීය.

ශ්‍රී ලංකාවේ වාහන එකලස් කිරීමේ කම්හලක් පිහිටුවීමට රජය ජපානයට යෝජනා කරන බව ද අමාත්‍යවරයා පැවසීය.

ජනාධිපතිවරයා ජපානයේ සිටින ශ්‍රී ලාංකික ප්‍රජාවේ සාමාජිකයන් ද හමුවනු ඇත.