මල්වතුහිරිපිටිය ප්‍රදේශයේ විහාරස්ථානයක දී භික්ෂුවක් ඝාතනය කළ සැකකරුවන් අදාළ භික්ෂුවගේන් යමක් ඉල්ලා ඇති අවස්ථාවේ දී ඇතිවූ බහින්බස්වීමකදී ගිනි අවියකින් අහසට වෙඩි තබා පසුව භික්ෂුවටද වෙඩි තබා ඇති බව පොලිස් පරීක්ෂණවල දී තොරතුරු අනාවරණය වී ඇතැයි පොලිස් මාධ්‍ය ප්‍රකාශක ජ්‍යෙෂ්ඨ පොලිස් අධිකාරි නීතිඥ නිහාල් තල්දුව පවසයි.

ඝාතනයට පැමිණි සැකකරුවන් ටී 56 වර්ගයේ ගිනි අවියකින් උන්වහන්සේට වෙඩි තබා ඇතැයිද හෙළිවන බව පොලිස් මාධ්‍ය ප්‍රකාශකවරයා සඳහන් කරයි.

මෙම ඝාතනය පෞද්ගලික ආරවුලක් මත සිදුවී ඇති බව පොලිසිය කළ විමර්ශනවලදී තොරතුරු අනාවරණය වී ඇත.

හිමිනම ඝාතනය සඳහා සැකකරුවන් ව්‍යාජ අංක තහඩු සහිත වාහනයකින් පැමිණ ඇති බවත්, ඝාතකයන් පිළිබඳ තොරතුරු තවමත් අනාවරණය වී නැති බවත්, ඔහු පවසයි.

මේ අතර, භික්ෂුව වෙඩිතබා ඝාතනය කිරීමේ අපරාධයට අදාළ පුද්ගලයන් පැමිණි බවට සැකකෙරන කාර් රථය කඩුවෙල පොලිස් වසමේදි ගිනි තබා ඇති බවට මෙතෙක් සිදුකරන ලද විමර්ශන වලදී අනාවරණයවී ඇත.

කඩුවෙල පොලිස් වසමේ කැළෑබද පාලු ස්ථානයක සැකකරුවන් විසින් රථයට ගිනිතබා පළාගොස් ඇති අතර, සැකකරුවන් සොයා වැඩිදුර විමර්ශන සිදුකරනු ලබයි.