IPL 2027 තරගවාරය සඳහා මුම්බායි ඉන්ඩියන්ස් කණ්ඩායමේ නව ප්‍රධාන පුහුණුකරු ලෙස හිටපු බටහිර ඉන්දීය කොදෙව් තුනඉරියව් ක්‍රීඩක කිරන් පොලාඩ් පත්කර තිබේ. ඒ, ශ්‍රී ලංකා ක්‍රිකට් ජනප්‍රිය ක්‍රීඩක මහේල ජයවර්ධන වෙනුවටය.

India Today වාර්තාවකට අනුව, මීට පෙර පිතිකරණ පුහුණුකරු ලෙස කටයුතු කළ පොලාඩ් මෙලෙස ප්‍රධාන පුහුණුකරු තනතුරට උසස් කර ඇති අතර, එය පස් වතාවක් IPL ශූරයන් වූ මුම්බායි ඉන්ඩියන්ස් කණ්ඩායම සමඟ ඔහුගේ දිගුකාලීන සබඳතාව තවදුරටත් පුළුල් කිරීමකි.

පොලාඩ් ක්‍රීඩකයකු ලෙස වාර 13 ක් මුම්බායි ඉන්ඩියන්ස් කණ්ඩායම නියෝජනය කළ අතර, IPL ක්‍රීඩා දිවියෙන් සමුගැනීමෙන් පසු පුහුණුකරුවකු ලෙස කටයුතු ආරම්භ කර තිබේ.

මෙම පත්කිරීම මුම්බායි කණ්ඩායම සඳහා නව පරිච්ඡේදයක් සනිටුහන් කරන අතර, 2027 IPL තරගවාරය සඳහා කණ්ඩායම සූදානම් කිරීමේ වගකීම පොලාඩ් වෙත පැවරේ.

මහේල ජයවර්ධන ඔක්තෝබර් 17 වැනි දින එම ධූරයෙන් ඉවත් වූ අතර, ඒ සමඟින් මුම්බායි ඉන්ඩියන්ස් සමඟ පැවැති දශකයක සබඳතාවක් නිමාවට පත්විය.

ඔහුගේ පුහුණුකාරීත්වය යටතේ 2017, 2019 සහ 2020 යන වසරවලදී IPL ශූරතා තුනක් මුම්බායි කණ්ඩායම විසින් දිනාගන්නා ලදී.