මැදපෙරදිග යුද්ධය හේතුවෙන් ගල්ෆ් සැපයුම් කඩාකප්පල් වී ඇති බැවින් ලොව පුරා රජයන් විසින් උපායමාර්ගික සංචිත මුදා හැරීමත් සමඟ පවා වාණිජ තෙල් තොග ඉතා වේගයෙන් පහත වැටෙමින් පවතින බව අන්තර්ජාතික බලශක්ති ඒජන්සියේ (IAE) ප්‍රධානියා ඊයේ (18) පැවසීය.

උතුරු අර්ධගෝලයේ ගිම්හාන සංචාරක සමය ළඟා වීමත් සමඟ හිඟයන් පිළිබඳ බිය වැඩි වෙමින් පවතී.

සැපයුම් බාධාවන් අඛණ්ඩව පැවතුනහොත් සති කිහිපයකින් ජෙට් ඉන්ධන හිඟයක් ඇති විය හැකි බවට ගුවන් සමාගම් අනතුරු අඟවා තිබේ.

“වාණිජ ඉන්වෙන්ටරි පහත වැටෙමින් තිබෙනවා … මම හිතන්නේ එය දැන් ඉතා වේගයෙන් ක්ෂය වෙමින් පවතින්නේ,” පැරිසියේ පැවති G7 මුදල් අමාත්‍යවරුන්ගේ රැස්වීමක් සඳහා පැමිණි ෆාති බිරෝල් මාධ්‍යවේදීන්ට පැවසීය.

“අපට තවමත් සති කිහිපයක් තිබෙනවා, නමුත් සංචිත වේගයෙන් පහත වැටෙන බව අප දැන සිටිය යුතුයි,” ඔහු පැවසුවේය.

පෙබරවාරි අග දී දියත් කරන ලද එක්සත් ජනපද සහ ඊශ්‍රායල ප්‍රහාරවලට පළිගැනීමක් ලෙස ඉරානය හෝර්මුස් සමුද්‍ර සන්ධිය හරහා ඉන්ධන නෞකා ගමනාගමනය ඵලදායී ලෙස නතර කිරීමත් සමග තෙල් සහ ගෑස් ගමනාගමනය පහළ යෑමෙන් ඉන්ධන මිල ඉහළ ගොස් ඇත.

යුද්ධය අවසන් කිරීම සඳහා සාකච්ඡා පවතින බැවින් රටවල් සිය තෙල් ඉන්වෙන්ටරි සහ ඔවුන්ගේ උපායමාර්ගික සංචිත ‘වාර්තාගත වේගයකින්’ භාවිත කරන බව අන්තර්ජාතික බලශක්ති ඒජන්සිය මේ මාසයේ පැවසීය.

අන්තර්ජාතික බලශක්ති ඒජන්සිය එහි සාමාජික රටවල් 32 විසින් හදිසි තොගවලින් බැරල් මිලියන 426ක් මුදා හැරීම සම්බන්ධීකරණය කර ඇති අතර, මේ මාසයේ දී බැරල් මිලියන 164ක් පමණ දැනටමත් ලබාගෙන ඇති බව පැවසීය.