August 23, 2023
හිටපු සිම්බාබ්වේ සුපිරි ක්‍රිකට් ක්‍රීඩක හීත් ස්ට්‍රීක් මියගිය බවට පැතිරුණු පුවත අසත්‍යයක් බව වාර්තා වේ.
මෙම වැරදි ප්‍රවෘත්තිය ප්‍රචාරය කර ඇත්තේ හීත් ස්ට්‍රීක්ගේ සමීප මිතුරකු වන ක්‍රිකට් ක්‍රීඩක හෙන්රි ඔලොංගා විසිනි.
හීත් ස්ට්‍රීක්ගේ අභාවය පිළිබඳ තමා විසින්ම කරන ලද හෙළිදරව්ව වැරදි බව සඳහන් කරමින් හෙන්රි ඔලොංගා නැවත පණිවිඩයක් නිකුත් කරමින් සඳහන් කර ඇත්තේ, හීත් ස්ට්‍රීක් ජීවතුන් අතර සිටින බවයි.
බදාදා නව ට්විටර් පණිවුඩයක් නිකුත් කරමින් ඔලොන්ගා කියා සිටියේ ස්ට්‍රීක්ගේ මරණය පිළිබඳ පුවත කටකතාවක් පමණක් බවයි.
“හීත් ස්ට්‍රීක්ගේ අභාවය පිළිබඳ කටකතා අතිශයෝක්තියට නංවා ඇති බව මට තහවුරු කළ හැකිය. මම ඔහුගෙන් ඇසුවෙමි. තෙවැනි විනිසුරු ඔහුව නැවත කැඳවා ඇත. ඔහු ජීවතුන් අතර, ”ඔලොන්ගාගේ නව ට්විටර් පණිවිඩයේ සටහන් වෙයි.
ඔලොන්ගාගේ මෙම ක්‍රියාව සිම්බාබ්වේ සහ අනෙකුත් අන්තර්ජාතික ක්‍රිකට් ක්‍රීඩකයන් ගණනාවක් ව්‍යාකූල කර ඇත.
මේ අතර, හීත් ස්ට්‍රීක් විසින්ම කටකතාව පිළිබඳව අදහස් දක්වා ඇත්තේ, “එය සම්පූර්ණ කටකතාවක් සහ බොරුවක් – මම ජීවතුන් අතර සහ හොඳින්. මම ඉතා කණගාටු වෙමි. මෙය පැතිරවූ කෙනා සමාව ගත යුතු යැයි මම විශ්වාස කරමි. ප්‍රවෘත්තියෙන් මට රිදුණා” යනුවෙනි.
