තලංගම අකුරේගොඩ ප්‍රදේශයේ සිදු වූ ද්විත්ව ඝාතනයට සම්බන්ධ තුවක්කුකරුවන් විසින් භාවිත කරන ලද බවට සැක කෙරෙන මෝටර් රථය ගාල්ල අගලිය කුට්ටියාවත්ත ප්‍රදේශයේ ප්‍රවේශ මාර්ගයක තිබී සොයාගෙන තිබේ.

නුගේගොඩ කොට්ඨාස අපරාධ විමර්ශන කාර්යාංශය පැවසුවේ වාහනය සොයා ගන්නා අවස්ථාවේ එය ගිනිගෙන තිබූ බවයි.

නීතිඥ බුද්ධික මල්ලවාරච්චි සහ ඔහුගේ බිරිඳ ඝාතනය කිරීමේ සිද්ධියට භාවිත කළ බව කියන මෝටර් රථය අගලිය ප්‍රදේශයේ අතහැර දමා ගොස් ඇති බවට තොරතුරු ලැබුණු බව පොලිසිය පැවසීය.

ඒ අනුව එම ස්ථානයට ගිය නිලධාරීන් නිරීක්ෂණය කළේ වාහනය ගිනිගෙන ඇති බවයි.

මෙම ද්විත්ව ඝාතනය මෙහෙයවා ඇත්තේ දැනට විදේශගතව සැඟවී සිටින පාතාල කල්ලි සාමාජිකයකු වන ජයලත් සිල්වා හෙවත් ‘කරන්දෙණිය සුද්දා’ විසින් බවට පොලිසිය සැක කරයි.

මියගිය නීතිඥවරයා මීට පෙර ‘කරන්දෙණිය සුද්දා’ වෙනුවෙන් අධිකරණයේ පෙනී සිට පසුව ඔහුගේ ප්‍රධාන ප්‍රතිවාදියා වන ‘ලොකු පැටී’ ලෙස හඳුන්වන පාතාල කල්ලි සාමාජිකයකු වෙනුවෙන් පෙනී සිටි බව මීට පෙර අනාවරණ විය.

නීතිඥවරයා කරන්දෙණිය සුද්දා පිළිබඳ තොරතුරු තම ප්‍රතිවාදියා සමඟ බෙදාගෙන ඇති බවට ඇති සැකය මත ඔහුගේ සහචරයන් විසින් මෙම ඝාතනය සිදු කර ඇති බවට පොලිසිය විශ්වාස කරයි.

සිද්ධිය සම්බන්ධයෙන් වැඩිදුර පරීක්ෂණ නුගේගොඩ කොට්ඨාස අපරාධ විමර්ශන කාර්යාංශය විසින් පවත්වනු ලැබේ.