ශ්‍රී ලංකාවේ වෙසෙන “අපගේ දමිළ ඥාතීන්ගේ අයිතිවාසිකම්” වෙනුවෙන් තමන් සැමවිටම පෙනී සිටින බව තමිල්නාඩු මහඇමති සහ TVK පක්ෂයේ නායක සී. ජෝසප් විජේ ප්‍රකාශ කළේය.

“අපි මුල්ලිවයික්කාල්හි මතකයන් අපගේ හදවත් තුළ දරා සිටිමු! මුහුදෙන් එතෙර වෙසෙන අපගේ දමිළ ඥාතීන්ගේ අයිතිවාසිකම් වෙනුවෙන් අපි සැමවිටම සහයෝගයෙන් පෙනී සිටින්නෙමු!” යැයි විජේ X ගිණුමේ සටහනක් තබමින් කියා සිටියේය.

ශ්‍රී ලාංකික දමිළ ජනතාවගෙන් කොටසක් සහ ඉන්දියාවේ වෙසෙන දමිළ ජනතාව මැයි 18 වන දින “මුල්ලිවයික්කාල් අනුස්මරණ දිනය” ලෙස සමරනු ලබයි.

මුල්ලිවයික්කාල් වෙරළබඩ ගම්මානයේ පැවැත්වුණු අවසන් හමුදා මෙහෙයුමේදී යුද්ධයෙන් මියගිය පිරිස් සිහිපත් කරමින්, 2009 වසරේදී දශක තුනක ශ්‍රී ලංකා යුද්ධය නිමාවට පත්වීම මෙයින් සලකුණු කෙරේ.

මෑතකදී පැවැත්වුණු තමිල්නාඩු ප්‍රාන්ත සභා මැතිවරණයේදී ශ්‍රී ලාංකික දමිළ ජනතාවගේ ගැටලුව ප්‍රධාන මැතිවරණ මාතෘකාවක් බවට පත් නොවීය.

කෙසේ වෙතත්, 2025 සැප්තැම්බර් මාසයේදී නාගපට්නම් දිස්ත්‍රික්කයේ පැවැති රැස්වීමකදී ද විජේ මෙම ගැටලුව ආමන්ත්‍රණය කිරීමට උත්සාහ කර තිබුණි.

“ඊළාම් දමිළ ජනතාව, ශ්‍රී ලංකාවේ හෝ ලෝකයේ වෙනත් ඕනෑම තැනක සිටියත්, තමන්ට මව්පිය සෙනෙහසක් දැක්වූ නායකයෙකු අහිමි වීමෙන් පසුව දුක් විඳිමින් සිටිනවා,” යැයි ඔහු පවසා තිබුණේ ඝාතනයට ලක් වූ එල්.ටී.ටී.ඊ. නායක ප්‍රභාකරන් පිළිබඳව පැහැදිලිවම සඳහන් කරමිනි.

“ඔවුන් වෙනුවෙන් හඬ නැගීම අපගේ යුතුකමක්,” යැයිද ඔහු එහිදී පවසා තිබුණි.

තමිල්නාඩුවේ බලයේ සිටින දේශපාලන පක්ෂ සාමාන්‍යයෙන් ප්‍රභාකරන්ට සහය දක්වන බවක් ප්‍රසිද්ධියේ පෙන්වීමෙන් වැළකී සිටින අතර, විජයිගේ සුළුතර රජයට, එල්.ටී.ටී.ඊ. හිතවාදී ස්ථාවරයක් සඳහා ප්‍රසිද්ධ VCK පක්ෂයේ සහයෝගය ලැබෙමින් පවතී.