පාතාල කල්ලි සාමාජික සංජීව කුමාර සමරරත්න හෙවත් ‘ගනේමුල්ල සංජීව’ ඝාතනය සම්බන්ධයෙන් කොළඹ අපරාධ කොට්ඨාසය අත්අඩංගුවේ පසුවන ඉෂාරා සෙව්වන්දි කිලිනොච්චියට රැගෙන ගොස් තිබේ.

සංජීවගේ ඝාතනයෙන් පසු ඇය දින කිහිපයක් සැඟවී සිටි බවට සැළකෙන ස්ථාන පරීක්ෂා කිරීම යටතේ ඇයව මෙලෙස රැගෙන ගොස් ඇත.

මේ අතර, ඉෂාරාට සමාන තරුණියක් සෙවීමට කටයුතු කර ඇත්ත කෙහෙල්බද්දර පද්මේගේ උපදෙස් පරිදි බව හෙළි වී ඇත.

එම සේවීම්වලදී, සුරේෂ් නම් පුද්ගලයකු විසින් යාපනයේදී ‘තක්‍ෂි’ නම් කාන්තාව සොයාගත් බව වාර්තා වේ.

පොලිසියට අනුව, තක්‍ෂිට සිංහල කතා කිරීමට නොහැකි අතර ඇයට විදේශ රැකියාවක් ලබා දීමේ මුවාවෙන් සුරේෂ් විසින් නේපාලයට රැගෙන ගොස් ඇති බව කියනු ලැබේ.

තක්ෂි මේ තත්ත්වය නොදැන නේපාලයට ගිය බවත් වාර්තා වේ.

පාතාල නායක සංජීව කුමාර සමරරත්න නොහොත් ‘ගනේමුල්ල සංජීව’ ඝාතනය සම්බන්ධයෙන් අවශ්‍යව සිටි සැකකාරිය වන ‘ඉෂාරා සෙව්වන්දි’ ඇතුළු සැකකරුවන් හය දෙනෙකුගෙන් පොලිස් කණ්ඩායම් තුනක් මේ වන විට ප්‍රශ්න කරමින් සිටී.

ඉෂාරා සෙව්වන්දිගෙන් ප්‍රශ්න කිරීමේදී සංජීවගේ ඝාතනයට අදාළ වැදගත් තොරතුරු කිහිපයක් අනාවරණ වී ඇති බව වාර්තා වේ.

ගනේමුල්ල සංජීව ඝාතනයේ ප්‍රධාන සැකකරු වන ඉෂාරා සෙව්වන්දි සහ සෙසු සැකකරුවන් කණ්ඩායම පසුගිය බදාදා සහකාර පොලිස් අධිකාරී රොහාන් ඕලුගලගේ නායකත්වයෙන් යුත් කණ්ඩායමක් විසින් ශ්‍රී ලංකාවට ගෙන එන ලදී.

පසුව සැකකරුවන් පොලිස් කොට්ඨාස කිහිපයකට භාර දෙන ලදී.

ඒ අනුව, ඉෂාරා සෙව්වන්දි, ‘ඩුප්ලිකේට් ඉෂාරා’ නොහොත් තක්‍ෂි, ‘ජේ.කේ. බායි’ නම් පුද්ගලයකු සහ ‘ජැෆ්නා සුරේෂ්’ නම් තවත් අයකු කොළඹ අපරාධ කොට්ඨාසයට භාර දෙන ලදී.

‘ගම්පහ බබා’ නමින් හැඳින්වෙන පුද්ගලයා බස්නාහිර පළාත් උතුර අපරාධ කොට්ඨාසයට භාර දෙන ලද අතර ‘නුගේගොඩ බබී’ නම් පුද්ගලයා බස්නාහිර දකුණ අපරාධ කොට්ඨාසයට භාර දෙන ලදී.

‘ඉෂාරා සෙව්වන්දි’ සහ තවත් පස් දෙනෙකු නේපාලයේදී අත්අඩංගුවට ගෙන බදාදා (15) ශ්‍රී ලංකාවට පිටුවහල් කරන ලද අතර පසුව, දින 90ක් රඳවා තබාගෙන ප්‍රශ්න කිරීමට ආරක්ෂක අමාත්‍යාංශය කොළඹ අපරාධ කොට්ඨාසයට අවසර ලබා දුන්නේය.