March 20, 2026
නීතිවිරෝධී ලෙස එකලස් කරන ලදැයි කියන වාහනයක් සම්බන්ධයෙන් අපරාධ පරීක්ෂණ දෙපාර්තමේන්තුව (CID) සිදුකළ පරීක්ෂණයක් මගින් තම මූලික අයිතිවාසිකම් උල්ලංඝනය වී ඇති බවට තීන්දුවක් ඉල්ලා පාර්ලිමේන්තු මන්ත්රී සුජීව සේනසිංහ ගොනුකළ පෙත්සමක් විභාග කිරීම අවසන් කළ ශ්රේෂ්ඨාධිකරණය, එහි තීන්දුව දින නියමයක් නොමැතිව කල්දැමීය.
ජනක් ද සිල්වා, අර්ජුන ඔබේසේකර සහ මේනකා විජේසුන්දර යන ත්රිපුද්ගල ශ්රේෂ්ඨාධිකරණ විනිසුරු මඩුල්ල විසින් අද (20) පෙත්සම් විභාගය අවසන් කෙරිණි.
පෙත්සම්කරු වන සුජීව සේනසිංහ වෙනුවෙන් පෙනීසිටි ජනාධිපති නීතිඥ අලි සබ්රි චෝදනා කළේ, පොලිසිය ව්යාජ තොරතුරු හරහා නීතිවිරෝධී ලෙස ලබාගත් අධිකරණ නියෝග මත පදනම්ව විමර්ශනය සිදුකළ බවයි.
නිසි නීතිමය ක්රියාපටිපාටි අනුගමනය නොකළ බවත්, විමර්ශනය තම සේවාදායකයාගේ මැතිවරණ ව්යාපාරයට හානි කිරීමට අදහස් කළ බවත් ඔහු තවදුරටත් කියාසිටියේය.
වගඋත්තරකරුවන් වෙනුවෙන් පෙනීසිටි නියෝජ්ය සොලිසිටර් ජෙනරාල් වරුණිකා හෙට්ටිගේ අධිකරණයට දැනුම්දුන්නේ විමර්ශනය වලංගු සෝදිසි වරෙන්තුවක් යටතේ සහ නීතියට අනුකූලව සිදුකළ බවයි.
දෙපාර්ශ්වය විසින් ඉදිරිපත් කරන ලද කරුණු සලකා බැලීමෙන් පසු, ත්රිපුද්ගල විනිසුරු මඩුල්ල පෙත්සම විභාග කිරීම අවසන් කර, තීන්දුව ප්රකාශ කිරීම දින නියමයක් නොමැතිව කල්තැබීය.
