පොලිස් විශේෂ කාර්ය බළකාය විසින් පාතාලය මර්දනය කිරීමේ මෙහෙයුම් නැවත ආරම්භ කර තිබේ.

කහතුඩුව ප්‍රදේශයේදී ඊයේ (25) අලුයම සිදු කරන ලද වැටලීමක ප්‍රතිඵලයක් ලෙස පාතාල නායකයකු වන ‘කොස් මල්ලි’ විසින් මෙහෙයවන ලද කුප්‍රකට කල්ලියට සම්බන්ධ කොන්ත්‍රාත් ඝාතකයකු මිය ගොස් තිබිණි.

මියගිය පුද්ගලයා, දෙහිවල පදිංචි ජීවන් චාමර ජානක (40) ලෙස හඳුනාගෙන ඇති අතර, ඔහු ජූලි 18 වැනි දින දෙහිවල දුම්රිය ස්ථානය අසලදී ‘බස් අසිත’ ලෙස හඳුන්වන පුද්ගලයකුට වෙඩි තැබීම ඇතුළු අපරාධ රැසකට සම්බන්ධ වී ඇති බව විමර්ශනවලින් හෙළි වී තිබේ.

මත්ද්‍රව්‍ය භාවිතය පිළිබඳ චෝදනා මත 2011 දී පොලිස් විශේෂ කාර්ය බළකායෙන් නෙරපා හරින ලද ඔහු එතැන් සිට කොස් මල්ලිගේ අපරාධ කල්ලියට සම්බන්ධ වී විවිධ පාතාල ක්‍රියාකාරකම්වල නිරත වී ඇත.

බස් අසිතට එල්ල වූ ප්‍රහාරය කොස් මල්ලි සහ තවත් පාතාල නායකයකු වන බඩෝවිට අසංක අතර දිගුකාලීන ආරවුලක් නිසා ඇති වූවක් බව පොලිස් විශේෂ කාර්ය බළකාය විශ්වාස කරයි.

අසිත යනු බඩෝවිට අසංක සහ වෙලා සුදා සමඟ සම්බන්ධ මත්ද්‍රව්‍ය ජාවාරම්කරුවන්ගේ සමීප ඥාතියකු බව කියනු ලැබේ.

බුද්ධි තොරතුරු මත ක්‍රියාත්මක වූ විශේෂ කාර්ය බළකාය කහතුඩුව ප්‍රදේශයේ නිවසක් වැටලූ අතර, එහිදී සැකකරු ටී-56 ප්‍රහාරක රයිෆලයකින් වෙඩි තබා විශේෂ කාර්ය බළකා නිලධාරියකුට තුවාල සිදු කළේය.

ප්‍රතිප්‍රහාරයෙන් ඔහු බරපතළ තුවාල ලබා රෝහලේදී මිය ගියේය.

වෙඩි හුවමාරුවෙන් පසු විශේෂ කාර්ය බළකාය විසින් එම ස්ථානයෙන් ටී-56 අවියක් සහ පතොරම් තොගයක් සොයා ගන්නා ලදී.